Кужэҥер район Коҥганур школышто математике ден информатикым туныктышо Роза Ефимовна Войкова школышто 30 ий пашам ышта. Туныктымо аланыште сайын тыршымыжлан кӧра пашан ветеранже, Российысе Федераций общий образованийын почетан пашаеҥ лӱмым сулен налын.
— Марий Элыш Пошкырт кундем гыч толынам. Мишкан район Нерге ялеш шочынам. Верысе кыдалаш школым 1980 ийыште тунем пытаренам. Йошкар-Олаште акам тунам акам тунемеш ыле. Тыге мый акам почеш толынам да Марий пединститутыш тунемаш пуренам. Тунемме пагыт писын эртыш. Самырык туныктышо семын Амурский областьыш Зейский районыш колтеныт. Вара Коҥганур школым вонченам, — манеш Роза Ефимовна.
Кызыт школышто математикым ФГОС почеш туныктат. Ик шот дене тунемме программе сай. Стандарт йоча-влакым шонаш тарата, тений икшыве-шамыч шагал лудыт, ушышто шотлен огыт мошто, калькулятор полшымо дене веле. Шуко жапым Интернетыште эртарат, модыт, да тулеч моло. Эн сай тунемме жап «шула». Тидыжан туныктышым моткоч тургыжландара.
— Математикым туныкташ неле. Тӱҥалтыш класслаште тунемме программе мылам ок келше. Йоча шукемдыме таблицым ок пале гын, ушышто шотлен ок мошто гын, тудлан визымше классыште тунемме программым умылаш неле лиеш. А кызытсе программыште тидлан шагал верым ойырат. Математике урокын шагатше шагалемеш. Мыланна йочан ончыкылыкшым жапыште ужын моштыман. Тудо сай лийже манын тыршыман. Ялысе йоча-влак кызытсе илыш деч почеш огыт код. Интернет, туныктымо сайтна уло, но нелылыкат вашлиялтеш. Тений ятыр школлан Интернетлан оксам йӧршын ойырымо огыл. Сандене Интервотыш кӧ кузе мошта туге лектеш. Школын чапшым выпускникна-влак нӧлтат. Нунын кокла гыч Татьяна Таныгинам (МарГУ-што программистлан тунем лектын) Костя Петуховым (МарГУ-што физиклан тунемеш), Настя Булыгинам (Юлтехын студентше) палемдынем.
М.СКОБЕЛЕВ.
Авторын фотожо.
Снимкыште: Роза Войкова.
