ЭКОЛОГИЙ

Нунат шужат, нунат кылмат

Юл кундем кугыжаныш технологиий университетын Ботанический садшын пашаеҥже-влак йӱштӧ игечыште садыште илыше кайык ден ур-влакым шкак пукшат. 

Вет тыге нунылан йӱштым чытен лекташышт куштылгырак. Илашышт да кочкашышт келыштарыме омарта ден кормушкыжым тушто тугакат ятыр вераҥдыме. А теве кочкыш шотышто нелылык эре лектеш. Сандене нуно оласе калык деке йодмаш дене лектыныт: кайыклан кочкышым кажне кумылан еҥ конден кертеш.

Мом вара кондаш лиеш:  тар, шӱльӧ, шыдаҥ шӱрашым, кечшудым, коям, шылым, коштымо пызлыгичкым, агытанорам, поланым, ваштарын, шӧрван кичкыштым, пӱкшым, пӱгыльымым, тумлегым, кальциян подкормкым.

Тыште кайыклан мом пукшаш ок лий шотыштат ушештарен кодыман, очыни. Тиде — жаритлыме, шинчалтыме сийым, мутлан, шинчалтыме коям але шылым, шопо шӧр-торык кочкышым. Тыгак свежа киндым, поснак уржа киндым, пуыман огыл. Тыгай кочкышлан кӧра кайыкын пагарыштыже шумаш тӱҥалеш. Цитрусым, банан шӱмым, арахисым, пряный кочкышым, когыльо ден беляш пудыргым, чипсым, пареҥгым кормушкыш опташ йӧршеш нимолан. 

Кайыклан йӧршӧ кочкышым Ботанический садыш тыглай паша кечын 8 гыч 17 шагат марте намияш лиеш. Йодыш лектеш гын, тыгай телефон номер дене йыҥгыртен, рашемден кертыда: 89278824320. 

С.Носова.

Опубликовать в Одноклассники

Добавить комментарий