ТАЗАЛЫК

Николаевым шуко ӱдырамаш пала

Тыйын шочшет, марий калык!

Николаевым шуко ӱдырамаш пала

Уке-уке, йорга пӧръеҥ семын огыл, а пеш кугу шинчымашан, ушан-шотан врач семын. Перинатальный рӱдерын пренатальный (лучевой) диагностике отделенийжын ультрайӱк йӧн дене диагностикым ыштыше врачше Леонид Николаев медициныште ынде пел курым утла тырша.

Казань оласе медицине университетым тунем пытарыше самырык специалист 1966 ийыште шочмо Морко районышкыжо пӧртылын да рӱдӧ эмлымверыште акушер-гинекологлан пашам ышташ тӱҥалын. Куд ий гыч тӱҥ врачым алмаштыше лийын. Тиде жапым верысе калык веле огыл, Леонид Терентьевич шкежат эн порын шарна. А 1976 ийыште, спецординатурым тунем лекмекыже, Конго Республикыште стажировкым эртымекыже, кугу ӱшаным пуышо докторым Йошкар-Оласе Азам ыштыме пӧртышкӧ кусареныт. Ончыч тыглай акушер-гинеколог лийын гын, вара тӱрлӧ отделенийым вуйлаташ пуэныт, но Николаевын тӱҥ пашаже эреак УЗИ дене кылдалтын. 1989 ийыште доктор Перинатальный рӱдерын эмлыме йӧнышкыжӧ ультрайӱкан шымлымашым шыҥдараш тӱҥалын да тыге Марий Элыште УЗИ-диагностикын ачаже лийын.

Тунам, кумло наре ий ончыч, россий медицине ава шӱм йымалне иланыше изи чумыркалан диагностикым ышташ тунемын гына, сандене талукышто чумыр элланжат 1000 деч шуко шымлымашым эртарен кертын огыл. А доктор Николаев изи Марий Элыштына идалыкыште 100 тыгай процедурым ыштен! Леонид Терентьевичын эртарыме кордоцентез манме пеш неле шымлымашкыже Российын чыла лукшо гыч ӱдырамаш-влак коштыныт да, уто мут деч посна, эсогыл шып пашам ыштыше пеш серьёзный врачлан шкеныштын, шочдымо йочаштын пӱрымашыштым ӱшанен, чудым вученыт. Да арам огыл! Докторын тыршымыж дене пеш шуко мужыр икшыван лийын.

Леонид Николаев пеш шуко ий Перинатологийыште да гинекологийыште ультрайӱк йӧн дене диагностикым ыштыше врач-влакын россий ассоциацийыштын лукмо «Пренатальный диагностике» журналын редакцийонный ушем еҥже лийын. Келге шинчымашыже ден кугу опытшым веле огыл, тыгак пашам йӱдшӧ-кечыже гаяк ыштен кертмыжым, тыгодымак скромный да шотан улмыжым палемден, тудын нерген россий медицине наукышто ойыртемалтше шанчызе-влак тӱнямбал кӱкшытан мероприятийлаште ик гана веле огыл кугешнен ойленыт.  

Марий Эл Республикын сулло врачше Леонид Николаев тазалыкым аралыме сфер дене кылдалтше ведомство-влакын чапкагазышт деч посна эше «За заслуги перед Марий Эл» орденын, «За заслуги перед Отечеством» II степенян орденын медальышт дене палемдалтын. Но доктор тачат ик эн тӱҥ наградылан йоча йӱк дене шергылтше еш пиалым шотла.  

Тений 1 августышто Леонид Терентьевичлан 75 ий темеш. Марий Элысе веле огыл, Российысе ятыр ӱдырамашлан палыме докторна тек кужу ӱмыран лиеш да эше шуко еҥлан полша. 

М.ИВАНОВА.

Снимкыште: Л.Николаев.

Опубликовать в Одноклассники

Добавить комментарий