Россий Федерацийын Тазалык аралтыш министерствыже 30 июнь-6 июль жапым Посна амаллан кӧра колымо чотым иземдымашке виктаралтше арня семын увертарен.
Статистике почеш, колымо да инвалидыш савырныме ик эн тӱҥ амал сусыргымо дене кылдалтын. Тудым икмыняр тӱшкалан шелаш лиеш:
- Производствышто сусыргымаш. Тудо чӱчкыдынжӧ лӱдыкшыдымылык правилым пудыртымылан, пашаеҥым пашалан ямдылен шуктыдымылан але оборудованийын шолдыргымыжлан кӧра лиеш. Тышке кӱшыч камвочмым, пашам ыштыше механизм деч сусыргымым, электротул перымым да шуко молым пурташ лиеш.
- Илыш-йӱла дене кылдалтше сусыргымаш. Тудо мӧҥгыштӧ лиеда. Амал тӱҥ шотышто шкем эскерыдыме да аралыдыме, тӱрлӧ приборым йоҥылыш кучылтмо дене кылдалтын. Тидлан кӧра айдеме капкыл ужашыжым пӱчкын, йӱлалтен але камвозын сусырта, аяртен лунчырта.
- Корнышто да транспортышто сусыргымаш. Тӱҥ амал, мутат уке, утыждене писын кудалыштме, транспортым йӱшывуя виктарыме да тӱткыжак огыл улмо дене кылдалтын.
- Спортышто сусыргымаш. Спорт дене заниматлалтме годым капкылын иктаж ужашыжым изиш йычкештарашат, чот локтылашат лиеш. Азап чӱчкыдынжӧ ситышын ырен шуктыдымылан але упражненийым йоҥылыш ыштымылан кӧра лиеда.
Поснак нелын сусыргымо годым кужун эмлалташ да йол ӱмбак шогалаш логалеш. Азапыш логалше шагал огыл еҥ корштымым икмыняр кече але арня чытен коштеш, медицине организацийыш специализироватлыме полышым йодын каяш огеш вашке да тидын дене писынрак паремаш шканже шке чаракым ышта.
А вет корнышто коштмо да кудалыштме правил-влакым шукташ, лӱдыкшӧ верыште аралыше саварым шогалташ, тыгак сай качестван прибор дене пайдаланаш, тул пижын кертме лӱдыкшым эскераш гын, сусыргымо деч утлаш лиеш!..
Пашам пуышо-шамычлан пашаеҥыштлан производствышто сусыргымо деч аралыше средствым ойыраш, оборудованийым жапын-жапын тергаш, лӱдыкшыдымӧ паша верым ышташ темлалтеш.
Спортышто сусыргымо деч аралыше экипировко дене пайдаланаш, тренировко ден ончыч, могырым ырыктен, чын ямдылалташ да лӱдыкшыдымылык техникым шукташ кӱлеш.
Сусыргымаш – пеш неле йодыш. Тудым тӱрлӧ шӧрын гыч ужын кораҥдаш кӱлеш. Тыштыже кугыжаныш, пашам пуышо ден граждан-влак иквереш тыршышаш улыт. Лӱдыкшыдымӧ йырвел – кажне айдемын тазалыкше да сай илышыж дене кылдалтше негыз.
Марат Габдуллин,
Республикысе клинический больницын приёмный отделенийжым вуйлатыше, медицине науко кандидат, МарГУ-н хирургий чер кафедрыжын доцентше.
Маргарита Иванова ямдылен.
Республикысе клинический госпитальын фотоархивше гыч налме фото.
