Шӧрту рак – ик эн кумдан шарлыше онкологий чер.
Статистике почеш, рак дене кажне кандашымше ӱдырамаш черланен кертеш. Ожно тиде чер нылле деч кугурак ийготан ӱдырамаш-влакым авалтен гын, таче шӧрту рак палынак «самырыкемын».
Но шӧрту рак – кумдан шарлыше осал пуалше веле огыл, тыгак диагнозым жапыштыже да чын шындыме годым эн сайын эмлалтше чер.
Марий Эл Республикын Медицине увер да аналитике рӱдержын палемдымыж почеш, 2017 ийыште «оҥ рак» диагнозым 206 ӱдырамашлан икымше гана шындыме, тений – 256 еҥлан. Черле-влакын чотышт кугемын толеш гынат, медик-шамыч тӱҥалтыш йыжыҥыште улшо ракым эмлаш лиймылан кугу ӱшаным пуат.
Ӱдырамашын тиде чер дене черланымыже тӱҥ шотышто диспансеризаций годым рашемеш, сандене кум ийлан ик гана эртаралтше тиде мероприятийым кӱлешанлан шотлыман. Тидын деч посна 35 ияш марте ӱдырамаш-шамычлан шӧрту УЗИ-м, а 35 деч кугурак ийготан-влаклан маммографий шымлымашым идалыклан ик гана эрташ тыршыман.
Оҥышто иктаж-мом тымарте палдырнымым (пеҥгыдеммым, пышкемым, умылаш лийдыме тамгам, «лимон шӱмым» да тулеч молым) ужмо-шижме годым, жапым шуйкалыде, маммологын приёмышкыжо кайыман.
М.ИВАНОВА.
