Калыкын икоян улмо кечыже вашеш Марий Элын Промышленность, экономически виянмаш да торговльо министерствыже соцсетьлаште оҥай акцийым эртараш темлен. Тудо калык творчествым, промыселым вияҥдымашке виктаралтын, тыгак кажне гражданиным шке калыкшын традиционный тӱвыражым арален кодаш полшаш кумылаҥдышаш.
Мом вара тидлан ышташ кӱлеш? Шке калыкын национальный костюмжым але тыгай элементан вургемым чиен, фотографийым ышташ да соцсетьлаш вераҥдаш. Организатор-влак акцийыш ушнышо-влак деч шке образым ончыктымаште фантазийлан эҥерташ темлат. Марий кундемна кидмастар-влак дене чаплана. Мом гына нуно огыт ыште: вӱдуа гыч пидыт, пушеҥге гыч пӱчкедат, куэкумыж гыч арверым ямдылат, тӱрым тӱрлат, национальный вургемым ургат… Икманаш, фотосо образым национальный вургем гоч веле огыл ончыкташ, ешартыш арвер денат сӧрастараш лиеш. А фотожым вара соцсетьлаште тыгай хештег-влак дене пырля вераҥдыман: #россия, #мыедины, #нхп, #марийэл, #наименованиепромысла.
Акций 4 ноябрь марте эрта.
С.НОСОВА
