Эртыше кечылаште Марий Эл вуйлатыше Александр Евстифеев Йошкар-Ола мучко паша дене коштын савырнен. Тудо ола кумдыкышто социально кӱлешан объект ден шуко пачашан илыме пӧртым чоҥаш йӧршӧ пайдаланыде кийыше яра мланде участкым терген лектын.
Регионым вуйлатыше кодшо арняште Правительстве пӧртыштӧ эртыше совещанийыште национальный проектым илышыш пуртымо йодыш-влакым каҥашыме годым олан мэрже Е.Масловлан тыгай верлам шымлен лекташ кӱштен.
Тачысе кечылан Йошкар-Олаште сайын вияҥше инфраструктуран микрорайонлаште яра кийыше тыгай участке ситышын. Кучемын шонымыж почеш, чыла шотыштат тыгай йӧнан илыме пӧртлан йодмаш лийшаш.
Марий Эл вуйлатыше «Звездный» микрорайонышто лийын. Тыштат 5 ий ончычак шуко пачеран пӧртым чоҥаш йӧршын чарныме. Ятыр объект мучаш марте чоҥен шуктыде тыгак шогат.
– Тиде кумдык олан перспективный районжылан шотлалтеш, тудо умбакыже вияҥшаш, садлан тыште илыме пӧртым да образовательный учрежденийлам нӧлтыман, – палемден Александр Евстифеев. Тыгак тудо олан рӱдӧ да эҥер вес могырысо ужашысе мланде участкым ончен савырнен. «Машиностроитель» микрорайоныштат шуко пачашан илыме пӧртым нӧлташ палемдалтеш. Тылеч посна план почеш Соловьёв, Павлов, Тургенев, Репин уремла дене авыралтме кумдыкышто шуко пачеран пӧртым чоҥаш палемдыме.
Ола пеленсе мланде участке-шамычым ончал савырныме годым Марий Эл вуйлатыше Йоча республиканский клинический больнице кумдык лишне ончыкыжым вертолёт площадкым вераҥдаш лиймымат шоналташ темлен. «Тазалык» национальный проект дене келшышын, санитарный авиацийлан площадкым тений чоҥаш тӱҥалшаш улыт.
Кызыт яра мланде участке шотышто аукционым эртараш документацийым ямдылат. Тидын деч вара проектированийым ыштат. Марий Эл вуйлатыше олан мэржылан кажне объект шотышто корно картым ямдылаш да палемдыме жапым эскераш кӱштен.
Марий Эл Республик вуйлатышын организаций да
аналитике виктемжын уверже негызеш Р.ЧЕПАКОВА ямдылен
