Марий Элын делегацийже Перьмыште Отечествын Геройжо-влакын кечыштлан пӧлеклалтше торжественный мероприятийыште лийын.
Шочмо эл верч вуйым пыштыше-влакым шарныме да кызытат илыше герой-влакым пагалыме порысым ончыктымо кугу мероприятийыш моло регион гычат шуко делегаций миен. Тиде событий кышкарыште пайрем концерт, ветеран-влак дене вашлиймаш да моло торжественный мероприятий эртеныт.
Кугу Отечественный сарын тале кредалмашлаштыже вуйым пыштыше-влакым шарныме лӱмеш ветеран, мер пашаеҥ, кучем еҥ-влак Урал добровольческий танк корпуслан мемориалыш пеледышым пыштеныт. А Кастене Солдатов лӱмеш тӱвыра пӧртыштӧ Отечествын Геройжо-влакын кечыштлан пӧлеклалтше торжественный погынымаште лийыныт.
Марий Элын делегацийыштыже илыш гыч кайыше Совет Ушем Герой-влакын эргышт ден ӱдырышт лийыныт, тиде – Юрий Владимиров, Александр Иванович Владимировын эргыже, да Роза Романова, Евсей Алексеевич Алексеевын ӱдыржӧ.
Ушештарена, Марий Эл Республикыште Отечествын 118 геройжо шочын-кушкын: Совет Ушем Герой – 56, тышечын 22 еҥже Кугу Отечественный сарыште колен, 34 еҥ – сар деч вара; Россий Федерацийын Геройжо – 5, тышечын кок еҥлан тиде чап лӱмым колымышт деч вара пуымо, кумытынжо Россий Федерацийын моло субъектыштыже илат; Чап орденын тичмаш кавалерже – 16, тышечын кумытынжо фронт гыч пӧртылын огыл, 13 еҥ сар деч вара колен; Социалистический Паша Герой – 41 еҥ, тышечын коктынжо кызыт Йошкар-Олаште да Медведево районышто илат.
2018 ий 1 декабрьлан Марий Эл Республикын калыкым социально аралыме органлажын учётыштыжо Социалистический Пашан кок Геройжо да Отечествын илыш гыч кайыше Геройжо-влакын 44 лишыл еҥышт шогеныт.
Российыште Отечествын Геройжо-влакын кечышт – шарнымашан кече, тудо ий еда 9 декабрьыште палемдалтеш. Тиде датым Россий Федерацийын 1995 ий 13 мартысе «Российыште воинский чап да шарнымашан дате-влак нерген» федеральный законжо дене пеҥгыдемдыме.
Тиде кечын Российыште Совет Ушем Герой, Россий Федераций Герой да Святой Георгийын орденжын, тыгак Чап орденын кавалерже-влакым саламлат.
М.ИВАНОВА.
