Эртыше кечылаште Йошкар-Оласе «Арена» манежыште мини-лапта дене Российын кубокшо верч таҥасымаште Марий Элын чапшым Звенигово районысо Кужмарий ӱдырамаш команде арален, кокымшо верым сеҥен налын.
– Тиде турнирлан ончылгочак ямдылалтынна. Арняш кум гана тренировкыш коштынна. Мутат уке, ялыште паша шукылан, адакшым шукышт ешан улмыштлан кєра шонымо семын чыланжак лийже манын ямдылалтын кертын огытыл. Модшыжат тӱрлӧ ийготан улына. Туныктышо, тунемше, студент-влак. Ме шке кундемыштына тыгай кӱкшытан таҥасымаш эртаралтмылан куаненна. Молан? Ӧрдыж кундемыш кошташ спонсорым, корнылан полышым кычалаш огеш кӱл. Тыгай сынан таҥасымашке мемнан команде деч посна икымше гана Йошкар-Оласе 20-шо №-ан школ гыч команде вийжым терген. Вес кундемла гыч толшо-влакым пален, вийнат иктӧр лийын. Кажне очколан кыртмен таҥасенна, йоҥылыш деч посна модаш тыршенна. Пошкырт кундем гыч толшо ӱдыр-шамыч дене модмо годым тургыжланаш логалын. Нуно эреак чемпион лийыныт. Тидыжак мемнам лӱдыкта, ала-мо… Психологически ямде онал, векат. Тыште изиш чарак уло. Модаш тӱҥалмекак, кум йоҥылышым колтен, соперник-влаклан 12 очком ешаренна. Вараже шокшо таҥасымаш лийын, но нуным поктен шуаш жап ситен огыл манаш веле кодеш, 11:21 очко дене сеҥалтынна. Ончыклан йоҥылышым тӧрлаш тӱҥалына, Российын чемпионатшылан ямдылалтына, – манын палемдыш Кужмарий команде гыч Анастасия Бычкова.
Руш лапта национальный модышым арален кодымо шотышто Звенигово районысо Кужмарий кыдалаш школышто туныктышо, тунемше-влакын чолгалыкыштым палемдыман. Тыште спортын тиде видше поснак сайын вияҥеш. Ты вид дене лач тиде команде тӱрлӧ кӱкшытан турнирлаште Марий Элын чапшым арала.
Е.Эшкинина.
