Мер Каҥашыште
Учебникше уло, тунемшыже лиеш мо?
Эртыше кугарнян, 29 январьыште, Мер Каҥаш вуйверын черетан заседанийыштыже ик эн тӱҥ йодыш марий йылмым туныктымо учебник да учебный пособий-влак шотышто лийын. Тидын нерген презентацийым Марий туныктыш институтын марий фиологий да культурологий кафедржым вуйлатыше, Марий Элыште шочмо йылмым туныктышо-влак ассоциацийым вуйлатыше Е.Игнатьева ыштен. Елизавета Ивановна палемдыме темым кумдан почын пуэн, але марте ыштыме паша лектыш, йодыш-влакым рашемдаш полшен. Таче кечылан чыла тӱрлӧ учебникшат уло манын палемден. Ындыжым электрон учебник-влакым ямдылаш пижман. (Тиде теме нерген кумданрак статьям лишыл жапыште лудаш темлена.)
А марий йылмым тунемше-влакын чотышт молан шагалемеш? Амалже кушто? Тиде йодышым Мер Каҥаш вуйверын еҥже-влак келгынрак шымлаш лийыныт. Тиде пашаш Марий Элын Образований да науко министерствыжын, районласе образований пӧлкан специалистышт, школ директор ден туныктышо-влакым ушаш палемдыме.
Вуйверыште тыгак Мер Каҥашын 2021 ийлан паша планжым пеҥгыдемденыт. Тудым кажне район ден регион гыч темлымаш-влакым шотыш налын ыштыме. Тыгак Мер Каҥашын куд комиссийжым (кажныжкыже икмыняр еҥым темлыме) пеҥгыдемдыныт. Посна мутланымаш «Марий Сандалык» журналын ончыкылыкшо шотышто лийын. Тылеч посна Российысе финн-угор калык-влак ассоциацийын 2021 ийысе паша планышкыже Марий Эл да Российыште марий-влакын илыме регионла деч мероприятий-влакым темлыме.
С.Пехметова.
Снимкыште: Оньыжа Э.Александров, Марий Эл правительстве председательын икымше алмаштышыже, вуйверын еҥже М.Васютин, Марий туныктыш институтын марий фиологий да культурологий кафедржым вуйлатыше Е.Игнатьева да кафедрын доцентше А.Илларионов – вуйверын заседанийыштыже.
А.Титовын фотожо.