Шукерте огыл Республикысе кокла медицине пашаеҥ-влакын ассоциацийыштын южо еҥыштлан Даша Севастопольскаян медальжым кучыктымо нерген кольым. Палынем ыле, тудым кӧмытлан пуэныт да молан? Кӧ тыгай Даша Севастопольская?
В.Андронова.
Волжский район.
Йодышлан Марий Эл Республикын Тазалыкым аралыме министерствыжын пресс-службыштыжо тыге вашештеныт:
– Тыге, сентябрь мучаште Даша Севастопольскаян медальжым Кужэҥер районысо рӱдӧ эмлымверын вашкеполыш фельдшерже Нина Гороховалан, район-влак кокласе Козьмодемьянск эмлымверын структурышкыжо пурышо Микрак участковый эмлымверын вашкеполыш фельдшерже Нина Лобановалан, Советский районысо рӱдӧ эмлымверын вашкеполыш отделенийжын фельдшерже Галина Марихиналан да Медведево районысо рӱдӧ эмлымверын Томшар фельдшер-акушер пунктшым вуйлатыше Людмила Ямбаковалан кучыктымо.
Дарья Лаврентьевна Михайлова – медсестра, Крым сарыште Севастопольым аралыше герой. Тудо сусыргышо да черле салтак-шамычым туге ончен, император Николай I Дарьялан «За усердие» шӧртньӧ медальым Владимирский лентыш пыштен кучыкташ да эше 500 теҥгем ший дене пуаш кӱштен. Статус почеш «За усердие» шӧртньӧ медаль дене тымарте кум ший медальым налше-влак гына палемдалтыныт, но Дашалан император исключенийым ыштен. Дашан примерже почеш Севастопольым аралымаште шогышо-влакын ватышт, акашт-шӱжарышт да ӱдырышт сусыргышо салтак-влакым ончаш тӱҥалыныт.
Даша Севастопольскаян медальжым поро кумылын, шкан пайдам кычалде полшымо, чаманен моштымо, профессионализмым ончыктымо йӱлам умбакыже шуктышо эн сай медсестра-влаклан кучыктат.
М.ИВАНОВА.
