Шукерте огыл Йошкар-Оласе эмлымверыш логальым. Ик кастене палатышкына «вашкеполыш» машина дене кондымо ӱдырамашым пыштышт. Иктаж кум кече гыч, шкенжым сайынрак шижаш тӱҥалмеке, у пошкудына кумыл волен мане: «Вашкеполыш» бригадын услугыж дене ынде нылымше гана пайдаланышым. У закон дене келшышын, тылеч вара «вашкеполыш» машинам ӱжмылан тӱлаш тӱҥалам…» Тыгай манеш-манешым колаш тӧченам ыле, но тудын вийыште улмыжым пален омыл. Тиде йодышем рашемден кертыда мо?
А.Скворцова.
Медведево район.
Йодышлан Йошкар-Оласе Вашкеполыш станцийын тӱҥ врачшым алмаштыше Елена МОРОЗОВА вашешта:
– Президент Владимир Путинын 2016 ий 20 июньышто лукмо «Россий граждан-влаклан вашкеполышым пуымо порядкыш вашталтышым пуртымо нерген» законжо дене келшышын, яра «вашкеполыш» дене инвалид, ийготыш шудымо йоча да илалше еҥ-влак нимучашдымын пайдаланен кертыт, моло граждан – идалыкыште 4 гана, тылеч вара услуго тӱлыман лиеш.
Тидын нерген тӱшка увер средствылаште, калыкыште уке-уке да ойлат, но! Йошкар-Оласе Вашкеполыш станцийлан тыгай кӱштымаш лийын огыл. Закон лекме деч вара жап шагал огыл эртен, южышт «вашкеполыш» бригадым кечеш 4-5 гана ӱжыктат гынат, тӱлыман услугым эше ик ганат пуэн огынал. Сандене «вашкеполышым» визымше гана ӱжыктымылан оксам тӱлаш кӱлеш манаш негыз уке.
М.ИВАНОВА.