КАЛАСЕ, "МАРИЙ ЭЛ"

Каласе, «Марий Эл»…: Налог компенсацийым пуатак мо?

Шукерте огыл электрон почтышкем налог компенсацийым налаш лийме нерген увер тольо. Шкеже нигушкат нимомат возен омыл… Палынем ыле, налог службо могай компенсацийым пуа? 

Л.Евдокимова.
Медведево район.

Йодышлан Россий ФНС-ын Марий Элысе виктемжын пресс-службыштыжо тыге вашештышт:

– Тиде уверым тыланда налог службын сайт-клонжо колтен. Тудо Россий ФНС сайтын ик разделже семын коеш. Пользовательлан паспортын данныйжым возаш темлалтеш, да тылеч вара диалоган окна почылтеш. Тушто подоходный налог гыч 0,91 процент кугыт компенсацийым налаш лийме нерген ойлалтеш. Тыгодым тиде компенсацийым законыш пуртымо вашталтыш негызеш тӱлаш ыштыме нерген ссылкат уло, но тудо налог тематике дене нигузеат кылдалтын огыл. «Компенсацийым налаш» манме кнопкым темдалын, пользователь вес лаштыкыш логалеш. Туштыжо банк картын номержым, тудын дене пайдаланаш лийме жапым, озажын лӱмжым, тыгак карт вес могырысо кодым возаш йодыт.

Мошенник-влакын тиде сервисышт тӱҥ шотышто социальный сетьлаште шарлен. Россий ФНС эше ик гана шижтара: налог орган ден граждан-влак кокласе электрон кыл «Налогым тӱлышын личный кабинетше» гоч веле ышталтеш. Сервис дене кылым кучышашлан гражданинлан инспекцийыш улыжат ик гана толаш да логин ден парольым налаш кӱлеш. Личный кабинетыште парымын але утыждене тӱлымӧ налогын кугытшым пален налаш, тыгак тӱрлӧ йодышым рашемдаш лиеш.

М.ИВАНОВА.

Опубликовать в Одноклассники

Добавить комментарий