Тыге ойленыт Йошкар-Оласе В.И.Ленин лӱмеш площадьыш чумыргышо ӱдыр-рвезе-влак. Тушто 28 апрельыште школышто, ссуз ден вузышто тунемше-шамычын ярмиҥгашт эртен.
Тудым Марий Эл правительстве председательын икымше алмаштышыже М.Васютин торжественно почын да салам мутым каласен. Саламлымашке республикысе ведомство-влакын пашаеҥыштат ушненыт.
Ты гана ярмиҥгаште 70 утла туныктымо тӧнежыште тунемше-влакын пашашт ончыкталтын. Самырык кидмастар-шамыч шке кидышт дене мом гына ыштен огытыл, мастарлыкышт чынжымак ӧрыктарен.
Теве Йошкар-Оласе торгово-технологический колледжысе студент-влакын емыж, саска гыч ямдылыме оҥай йӱксышт шӱвылвӱдым луктын. Звенигово район Красногорский посёлкысо школын тунемшышт пу гыч тӱрлӧ кӱлешан арверым пӱчкеденыт: шӱртым пыштыме атым, кампеткылан вазым, молымат. Тиде моторлыкым 6-шо классыште тунемше Д.Молтаков ден 9-ше класс гыч П.Дружинин ыштеныт.
А рӱдоласе 27-ше №-ан школын ӱдырышт шке ургымо вургемым, сылнештарыме ӱзгарым темленыт. Нуно чылажымат «Рукодельница» кружокышто ышташ тунемыныт. Тудым технологийым, рисованийым туныктышо А.Пушкина вуйлата.
Оршанкысе шуко профилян колледжыште тӱҥалтыш класслаште туныктышылан тунемше Д.Смирнов поснак ӧрыктарен. Тудо бисер, изи шер гыч тӱрлӧ пушеҥгым, пеледышым ыштылеш. Рвезе тиде сомыллан кумшо классыштак кумылаҥын да калыкым ынде индешымше ий куандара. Кызыт тудо шкаланже да йолташыже-влаклан гына огыл, йодмо почешат ышта, ужалашат луктеш. Пашаже-шамыч регион кокласе, тӱнямбал конкурсышто ятыр гана сеҥышыш лектыныт.
Йошкар-Оласе сервис технологий техникумын ӱдыржӧ-шамычат ойыртемалтше пашам ончыкташ луктыныт. Нунын «string art» йӧн дене ыштыме кидпашашт молын деч поснак ойыртемалтын. Изирак пуда да шӱртӧ дене «тӱрлымӧ» панношт шукыштым сымыстарен.
Строительно-промышленный техникумын студентше А.Авипов пужар да моло столяр ӱзгар дене мастарын пайдаланен моштымыжым ончыктен. Советский район Ӱшнур школын 4-ше классыштыже тунемше М.Ягодарова шун гыч мотор кӧршӧкым ненчен. Медведево гимназий гыч М.Насибулинын ыштыме пӱкенжым ярмиҥгаш мийыше чыла йоча куанен ончен.Кажнын тушко шинчын ончымыжо шуын, вет пӱкен вуйым изи мотор имне сӧрастарен.
Ярмиҥга оҥайын эртен. Тушто «Мастар-влакын олашт», «10 эн сай сату» да моло конкурс эртен. Тылеч посна ӱдыр-рвезе-шамычлан шийвундымат ыштен лукташ сай йӧн лийын.
Л.ШАБДАРОВА.
Д.Речкинын фотожо.
