КУЧЕМ УВЕР

Марий Эл сай шонымашым шочыктен

Теҥгече Марий Элын Правительстве пӧртыштыжӧ РФ Президентын Юл кундем федеральный округысо полномочный представительже Игорь Комаров ден республикнам вуйлатыше Александр Евстифеев вашлийыныт.

Визит дене толын коштмыжым иктешлыме годым И.Комаров Марий Эл правительствын пашажым регионын Россий Президентын майысе указшым илышыш пурташ ямде улмыж шотышто сай велым аклен.

Вашмутланыме годым нуно медицине, перинатальный рӱдер-влакым чоҥаш, кадрым ямдылаш кӱлмӧ йодышлам радамлын лончыленыт.

«Регионысо корно пеш начар, сандене тудым национальный проект полшымо дене сай велыш вашталташ йӧн уло. Тичмаш налмаште, республик шотышто сай шонымаш шочо, но ончылно эше пеш шуко паша вуча», – палемден полпред.

А.Евстифеев полномочный представительын регионыш толын коштмыжым кӱлешанлан шотлен да рашемден:

– Республикыштына чыла паша план почеш ышталтеш. Тылеч посна регионысо корным чоҥымо да олмыктымо пашалан оксам муаш тыршаш кӱлеш. Тидын нерген Игорь Анатольевичлан каласыме. Чыла проблемым кораҥденна, умбакыже сай лиеш манын ом керт. Проектым илышыш пурташ манын, пашам кажне кечын ыштыман. Республикланна Россий Президентын указше – пеш кугу пайда, вет нацпроект-влак полшымо дене ме ончыкылыклан палемдыме ятыр проект ден задачынам шуктен кертына».

Марий Эл Республик вуйлатышын организаций да аналитике виктемжын уверже негызеш М.ИВАНОВА ямдылен.

 

Опубликовать в Одноклассники

Добавить комментарий