Марий Эл Республикын кудымшо созыв Кугыжаныш Погынжын 30 ноябрьыште лийшаш 31-ше бюджетный сессийжылан ямдылалтме дене келшышын, республикын финанс министерствыштыже Депутат кече эртен.
Тушто 2018-2020 ий-влаклан Марий Элын социально-экономический вияҥме прогнозшо ден республиканский бюджетын проектше дене палдареныт.
Депутат кечын пашашкыже Марий Эл Республикын министрже – Марий Эл Республик вуйлатышын полномочный представительже С.Трухин, икмыняр министерстве ден ведомство вуйлатыше ден представитель-влак ушненыт.
Промышленность, экономический вияҥмаш да торговльо министрын пашажым жаплан шуктышо Д.Пугачев республикын шушаш кум ийыште кузе вияҥшашыжын тӱҥ показательже-влак дене палдарен.
2018 – 2020 ийлаште валовый региональный продуктын кушмо идалыкаш кокла темпше 101,5 – 101,7 процент лийшаш. 2020 ийыште тудын кугытшо 197 млрд теҥгешке лишемшаш. Тидыже промышленностьышто да ялозанлыкыште кугу кӱкшытыш шумылан кӧра лийшаш. Мутлан, 2018 ийыште ялозанлыкыште чыла тӱрлӧ категорий сату производствын кугытшо 47 млрд теҥгешке шушаш.
2020 ийыште озанлыклаште пырчын валовый производствыжо 225,3 тӱжем тонн, пакчасаскан – 178 тӱжем тонн, пареҥгын – 315 тӱжем тонн, шӧрын – 188 тӱжем тонн, шылын – 280 тӱжем тонн, муно – 415,8 млн штука лийшаш.
Экономике кушмо дене республикысе калыкын доходшат ешаралтшаш. 2020 ийлан кокла пашадар 29,4 тӱжем теҥге наре марте кугемшаш.
Тӱҥ финанс документ – республикын бюджетше, тудо кузе чумыралтме, тӱҥ роскот ден доход направлений нерген Марий Эл Республикын финанс министрын пашажым жаплан шуктышо А.Торощин радамлын каласкален. Ойлымыж почеш, мутлан, республиканский адресный инвестиционный программыш пурышо объект-влакым чоҥымо дене погынышо кредит парымым тӱлаш 536,1 млн теҥге, предприниматель да инвестиций пашам вияҥдаш – 44,6 млн теҥге, кугыжаныш парымым обслуживатлаш 894 млн теҥге ойыралтшаш.
Муниципал образований-влакын бюджетыштлан 6,2 млрд тенге окса полыш лийшаш. Тидыже — тенийсе деч 1,3 пачаш шукырак. Тӱҥ ужаш – 94 процент – целевой субсидий ден субвенций лийыт. Тыгак верысе инициативым поддержатлыме шотышто проект-влакым илышыш шындарыме паша умбакыже шуйна.
Марий Эл Республикын бюджетышкыже вашталтыш-влак Кугыжаныш Думышто федеральный бюджетын кокымшо лудмашыж деч вара пурталтыт.
Кажне выступлений деч вара депутат-влак шке темлымашыштым каласеныт, йодышым пуэденыт.
Л.Камалетдинова.
