Марий Элым вуйлатыше Александр Евстифеев Россий Федерацийын экономический вияҥмаш министрже Максим Орешкинын эртарыме видеосовещанийыште участвоватлен.
Тушто «Изи ден кокла кугытан предпринимательстве да индивидуальный предпринимательский инициативылан полыш» национальный проектын мероприятийже-влакым пайдалын шуктымо дене кылдалтше йодышлам каҥашыме. Мутланымаш видеоконференцсвязь режим почеш эртен. Тидын годым нацпроектын мероприятийлажым писын шуктышашлан регион-влак ончылно шогышо задаче-влакым да бюджет оксам жапыштыже да пайдалын кучылтшашлан РФ-ын субъектше-влакын палемдыме мере-шамычым ончен лекме.
Марий Элыште кызыт «Изи ден кокла кугытан предпринимательстве да индивидуальный предпринимательский инициативылан полыш» национальный проект дене келшышын, 5 региональный проектым пеҥгыдемдыме. Нуным 2019-2024 ийлаште шукташ чылаже 1209,4 миллион теҥге ойыралтеш.
«Изи ден кокла кугытан предпринимательствын субъектше-влакын финанс ресурсым налын кертме, тидын шотыштак льготан финансирований дене пайдаланен кертме, йӧным кумдаҥдымаш» проект ты жапыштак шукталтшаш. Тудым илышыш шыҥдараш чылаже 200,3 миллион теҥге колталтеш.
«Изи ден кокла кугытан предпринимательствын субъектше-влакын акселерацийышт» кокымшо проектыште бизнеслан полышым пуымо региональный инфраструктурым вияҥдаш да уэмдаш палемдалтеш. Тиде проект дене келшышын, «Мыйын бизнесем» рўдерым ышташ ойым пидме. Тыгак региональный проектын кӱлешан мероприятийжылан технопаркым ыштымаш шотлалтеш.
Тылеч посна изи ден кокла кугытан предпринимательствын субъектше-влаклан шке сату дене вес элласе рынкыш лекташ полшышашлан экспортлан полшышо рӱдерым ышташ да вияҥдаш палемдалтеш.
Проектым финансироватлыме чумыр кугыт 6 ий жапыште 681,5 миллион теҥгеш шуэш.
«Предприниматель пашам шуктымо условийым саемдымаш» кумшо проекыште изи ден кокла кугытан предпринимательствын социальный предпринимательстве да элкӧргӧ туризм сферыште пашам ыштыше субъектше-влаклан полышым пуымо шотышто тичмаш мере комплексым рашемдыме.
Кӱшнӧ ончыктымо региональный проект-влакын мероприятийышт Марий Эл Республикын «2013-2025 ийлан экономический вияҥмаш да инвестиционный паша» кугыжаныш программыжын «Изи ден кокла кугытан предпринимательствым вияҥдымаш» подпрограммыштыже ончыкталтыт.
Моло кок региональный проект предпринимательстве пашалан кумылаҥдымашке да фермер-влаклан полшен шогымо системым ыштымашке, ялыште кооперацийым вияҥдымашке виктаралтыныт.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
