Санкт-Петербургышто технологий дене всероссийский олимпиадын пытартыш этапыштыже Йошкар-Оласе 28-ше №-ан школын 11-ше классыштыже тунемше Михаил Бакулевский сеҥышыш лектын.
Тиде гана тушто шинчымашым Россий Федерацийын 65 регионжо гыч 241 тунемше терген. Ик эн пӱсӧ уш-акылан-влакым онлайн йӧн дене саламленыт, тыгай-шамыч радамыште тений – 19 сеҥыше да 89 призёр.
Михаил Бакулевский технологий дене всероссийский олимпиадыште 7-ше класс гычак шинчымашыжым ончыкта, 9-ше классыште улмыж годым призёр радамыш лектын.
Лицейым вуйлатыше Сергей Нагорныйын мутшо почеш, рвезе – дисциплиным да пашам йӧратыше, шке шинчымашыжым пойдарен моштышо. «Моткоч шотан да кеч-кӧланат полшаш ямде. Сай результатыш шуаш манын, Михаил физикым, электротехникым, робототехникым, черченийым, экономикым, агрономийым, зоотехникым, обществознанийым шке гыч тунемын. Проектым аралыме годым артистыш савырныман да моторын ойлен моштыман», – палемден тудо.
Г.КОЖЕВНИКОВА