УВЕР ЙОГЫН

Марий Элыште «Защитим детство» республиканский акций эртен.

Еш гыч поген налыныт, пӧртылтенытат

Марий Элыште «Защитим детство» республиканский акций эртен.

Тылзе жапыште икшыве шотышто торжа койышым ончыктымым, ийготыш шудымо-влакын правам пудыртылмыштым, перныл коштмыштым эскереныт да тергеныт.  Ты шотышто семинарым, совещанийым, «йыргешке ӱстелым», ача-ава-влакын погынымашыштым, практикумым, «шокшо линийым», моло мероприятийым эртареныт.

Акцийын участникше-влак удан илыше, неле илыш ситуацийыште улшо, элкӧргӧ органлаште учетышто шогышо чылаже 2000 утла ешыш- миеныт да икшыве, нунын ача-авашт дене мутланеныт. Самырык-влак чумыргымо верлаште ӱдыр-рвезе-влакын арака але наркотик дене аҥыргыше улмыштым, кастене шкет коштмыштым тергеныт.

Тиддеч вара 334 еҥым административно мут кучаш шогалтеныт; икшыве дене шкем торжан кучымылан 2 уголовный делам тарватеныт; ача але ава права деч посна кодаш йодмашан 20 исковой заявленийым судыш колтеныт; илышыштлан да тазалыкыштлан лӱдыкшӧ улмылан кӧра ийготыш шудымо 14 икшывым еш гыч поген налыныт.

Тыгак акцийыш ушнышо-влак 198 йоча учрежденийыште лийыныт. Ийготыш шудымо 28 икшывым кычал муын пӧртылтеныт. Нунын кокла гыч 12 ӱдыр ден рвезе еш гыч, 16 – йоча учреждений гыч лектын каеныт улмаш.

Акций жапыште окса шотышто нелын илыше 368 ешлан шийвундым ойыреныт, 2449 ешлан консультацийым пуэныт.

Л.Камалетдинова.

Опубликовать в Одноклассники

Добавить комментарий