Александр Евстифеев «Марий Эл Дорстрой» АО-н производство базыштыже лийын, палдара Марий Эл вуйлатышын организаций да аналитике виктемже.
Республикысе автокорным ачалыме йодышым верыш лектын эртарыме совещанийыште тиде акционер ушем вуйлатыше-влак дене каҥашеныт.
Регионыштына ты предприятий корным чоҥымо отрасльыште лидерлан шотлалтеш. Тудын 9 филиалже республиканский значениян 3 тӱжем утла километр автомобиль корным обслуживатла.
Мутланымаште предприятийын производство куатшым кучылтмо йӧн-влакым каҥашеныт. Тидыже Россий президентын «майысе» указшым шуктымо дене кылдалтын. Документ дене келшышын, Марий Эл лӱдыкшыдымӧ да сай качестван автомобиль корно программышке ушнен. Тидлан РФ правительстве гыч 17 млрд. теҥге окса полыш лийшаш. Тышеч 3 миллиард теҥгеже Марий Элыш вес ийын толын шушаш. Оксам республикысе автомобиль да Йошкар-Оласе уремлаште корным шотыш кондаш кучылтыт.
— Ме корным чоҥаш техникым лизинг але вес йӧн дене налшаш, кадр политике, экономике йодыш-влакым каҥашена. Тидым варарак ыштена гын, вес ийысе бюджетым огына освоитле. Тиде амал дене республик национальный приоритетный программым огеш шукто. А тыгай марте шукташ огеш лий. Сандене келшен толшо решенийым муына да тудо илышыш пурталтеш манын ӱшанена, — каласен Марий Эл вуйлатыше.
«Марий Эл Дорстрой» АО-н генеральный директоржо Александр Карташовын мутшо почеш, корным ачалыме шотышто у федеральный программым илышыш пуртышашлан дорожник-влак ончылно кызыт могай задаче шындалтын, але марте предприятий тыге пашам ыштен огыл. Тушто ятырлан кугу объем палемдалтын.
— Корно отрасль тыгай полышым шукерстек налын огыл. Тыгай кугу пашам тӱҥалшашлан ямдылалташ кӱлеш: техникым уэмдыман, чоҥымо материалым налме йодышым рашемдыман, — палемден Александр Карташов.
Мутланымаш годым Александр Евстифеев пашам могай подрядный организаций-влакын шуктен кертмыштым рашемден.
— Тиде предприятий корным качественно чоҥымо, уэмден тӧрлатыме да ачалыме дене кылдалтше утларак кугыт пашажым шуктышаш. Тыште федеральный огыл, а республиканский да верысе значениян корно-влак нерген ойлалтеш, — каласен Александр Евстифеев.
Ушештарена, элын президентшын «майысе» указшын корно движений лӱдыкшыдымылык нерген ужашыштыже палемдыме почеш, Российыште 6 ий гыч региональный корно-влак гыч пелыжым норматив дене келшышын шотыш конден шуктышаш улыт. 2024 ийлан корнылаште ДТП лийме вер-влак 2 пачаш шагалемшаш, корно туткарлан кӧра колымаш 3,5 пачаш иземшаш.
Л.Камалетдинова.
