Туризм

Марий Элым ужаш вашкыше-влак улыт…

Марий Элын Российысе ТОП-10 эн чапланыше турист регион радамыш пурымыж нерген уверлан куаныде огеш лий. А Трипадвайзорын палемдымыж почеш, Йошкар-Оласе «Теплая речка» трактир тӱнямбалсе ик эн сай 10 % ресторан-влак радамышкат пура…

5 ий пашам ыштыме жапыштыже тудын озаже-влак эре иктаж-могай да кулинар рекорд дене ӧрыктарат. Мутлан, 2017 ийыште тушто эн кӱкшӧ команмелна кышылым ыштеныт. Гиннессын книгажын ончычсо рекордшым иктат пеле пачаш эртен кертыныт. Туштак варажым тӱнямбалнат эн кугу подкогыльым ыштеныт.

Тыгай трактирже Российыштыжат икте веле, вет тудо Веронысо Джульеттан тоштержын филиалышкыже савырнен. Ты заведенийын верланыме кумдыкыштыжо але марте кок ӧрыктарыше памятникымат вераҥденыт: иктыже Й буквалан, весыже подкогыльлан пӧлеклалтын. Трактир оза-влак Иван ден Юлия Антроповмытын чолгалыкыштлан да творческий кумылан улмыштлан ӧраш гына кодеш.

А теве кодшо каныш кечылаште тушто эше ик ӧрыктарше «Марий Элыш толаш вашкыше турист-шамычлан» шарныктышым почыныт да тӱнямбал рекордым шынденыт — эн кугу тортым кӱэштыныт.

Ынде радам дене ты кок кугу событий дене палдарена. Ончыч памятник нерген. Тудо пеш оҥай – пӧрдшӧ мланде шарым шке ӱмбалныже черепахе наҥгая. Шаржын диаметрже 1,5 метран. А туштыжо Марий Элын картшымат, Йошкар-Олаш вашкыше турист ешымат ужаш лиеш. Черепахынат вачыштыже Марий кундем дене палдарыше икмыняр сӱретым келыштарыме. Вурс гыч ыштыме ты конструкций эше кӧргыж гыч волгалтеш. Кас пычкемышыште тудо моторын коеш.

Шарныктышым почмашке Марий Эл вуйлатыше Александр Евстифеев миен ыле. Тудо памятникым Марий Эл Республикын 100 ияш лӱмгечыжлан сай пӧлек семын аклен. Амалжат уло, вет туризм регионыштына сайын вияҥеш. Пытартыш кум ийыште республикыш толшо турист чот кум пачаш шукемын. 813 тужем еҥ толын каен, а тидыже республикыште илыше-влакын чотыштымат эрта. Чылаже 287 турмаршрут пашам ышта, изи кундемлан тиде шагал огыл. Событийный туризм дене кылдалтше «Серебряная лига» ТОП-30 национальный рейтингышкат 2018 ий гыч пурена. Турист-влакым кумылаҥден кертше событийже ятыр лиеда.

Поснак сайын республикыште гастрономический туризм вияҥеш. Кок региональный брендым регистрироватлыме, тиде — «Сернурская легенда» сыр да «Курыкмарий кравец». Кызыт «Теплая речка» трактирын озаже-влак «Марий подкогыльым» брендыш савырыме пашалан пижыныт.

Ты кастене трактирын кулинарже-влак уло Российланат ӧрыктарыше, фуд-арт жанрыште художественный акцийым эртареныт — Марий Эл Республикын картше сынан тӱнямбалнат ик эн кугу тортым кӱэштыныт. Тудо латныл районым ончыктышо тӱрлӧ сынан ужаш гыч шоген. Ты кочмыверыште тугакшат кочкаш мийыше уна-шамычлан натуральный продукт гыч ямдылыме чес-влакым гына темлат. У рекордланат лачшымак Марий Элыште ыштен лукмо подуктым гына кучылтыныт. Торт 402х260 метр лопкытан, нелытше 505 килограммыш шуын. Ӧрыктарыше сийым ыштыме нерген йодмашым Гиннессын рекорд книгашкыже пурташ ончылгоч колтеныт. А рекордым регистрироватлаш манын, «Интеррекорд» тӱнямбал агентствын экспертше-влак толыныт.

Регистраций деч вара торт дене мероприятийыш толшо уна-влакым сийленыт да кодшо ужашыжым — 3200 порцийым — республикысе йоча пӧртлаш колтеныт. Кулинар рекордым аклаш лӱмын Москва гыч ресторан критик Олег Назаров толын.

Тӱнямбал рекордым ыштыме касыш Федераций Советыште Марий Эл кугыжаныш кучемын исполнительный органжын представительже Константин Косачев толын ыле. Тудо трактир оза-влаклан Федераций Совет Председатель Валентина Матвиенкон тауштымашыжым кучыктен. Кодшо телым Антроповмыт еш Федераций Советыште Марий Элын кечыже-влакым эртараш полшеныт, сенатор-влаклан марий калык кочкшым авызлаш йӧным ыштеныт.

Гастрономический рекордым шындыме мероприятийште тыгак Татарстанысе да Коми Республикысе туризм министерстве-влакын еҥышт лийыныт. Пайрем кумылым «Эреҥер» ансамбль, кӱслезе ӱдыр-влак нӧлтеныт.

С.НОСОВА

Опубликовать в Одноклассники

Добавить комментарий