25 апрельыште «Октябрь» кинотеатрыште Озаҥ ола гыч режиссёр Инесса Куляжеван «Моя дорога к юмо» фильмжым ончыктат.
Фильм марий калыкнан арален коден кертме ойыртемалтше йӱлаже, вераже, тыгак астрономий да мифологий дене кылдалтше илыш умылымышыже нерген каласкала. Таклан огыл тудым ончыктымашым Марий Талешке кече вашеш келыштарыме. Кинофильмым тӱшка калыклан ончыкташ манын, марий самырык-влакын «У вий» ушемыштлан тауштыман. Тудын вуйлатышыже Николай Шабдаровын тыршымыж дене шийвундымат муыныт.
Кинофильм «Октябрь» кинотеатрын кокымшо залыштыже 18 шагатат 20 минутлан тӱҥалеш.
С.Носова.
