Алексей Курыкмарий районысо Йоласал ялеш шочын-кушкын. Верысе школ деч вара Марий кугыжаныш университетын культур да искусство факультетыштыже шинчымашым пойдарен. Изинекак спортым йӧратыше рвезе молан тӱвырам ойырен налын? Вуз деч вара «Марий Эл» ансамбльыш кузе логалын? Нине да моло йодышлан, шкеж дене мутланымеке, пален нална.
Лаштыкнан тачысе унаже – Я.Эшпай лӱмеш Марий кугыжаныш филармоний пеленысе «Марий Эл» кугыжаныш куштышо ансамбльын солистше Алексей ПОЛИКАНОВ.
— «Марипарк» куштымаш спектакльыште тӱҥ рольым — ялысе рвезым – модат. А тый Марий паркыштыже лийынат?
— 2006 ийыште МарГУ-шко тунемаш пураш толмо годым Марий парк лийын огыл. Варажым тудын олмышто Чарла Кремльым чоҥеныт. Тушто самырык-влакын погынен, жапым веселан эртарымышт нерген шуко колынам. А кунам тиде спектакльым шындаш тӱҥалынна, Марий парк нерген эше шукырак уым пален налынам. А тӱҥ рольым модаш – тиде кугу ответственность, вет чылажымат: йӧратымашым, тургыжланымашым да молымат — куштымаш гоч ончыкташ кӱлын. Такшым школышто тунемме годым пайремлаште тӱрлӧ сценкыште шуко гана модаш логалын.
— Изинекак артист шӱлышан кушкынат?
— Сценыште модаш келшен, но мылам спорт лишыл лийын. Футболым чот йӧратенам, эсогыл урок гыч йодын, Козьмодемьянскыш тренировкыш кудалыштынам. «Спартак» команде гыч Егор Титов гай лиймем шуын.
— А трукышто шонымашым вашталташ да тӱвырам ойырен налаш мо таратен?
— Такшым МарГУ-со спорт факультетыш тунемаш пураш шоненам, но тушко биологий дене ЕГЭ-м кучаш кӱлын улмаш, а мый вес предметлам сдатленам. Сандене ятыр факультет кокла гыч культур да искусствым ойырен налынам. Тидланже туныктышем-влакат чотак ӧрыныт ыле. Чебоксарысе МВД училищышкат тунемаш каяш кумыл лийын, но тушко документым пел ий ончычак сдатлыман улмаш. А мый, ялысе рвезе, тидым кушеч паленам?
— Тугеже университетыште тунеммет годымак «Марий Эл» ансамбльыш толынат?
— Кокымшо курсышто, октябрьыште, тиде коллективыш ушненам: эрдене тунемаш коштмо, а вара — репетицийыш да уэш университетыш. Икымше гана Морко вел куштымашым куштенам, тунам Моско Кремльыш концерт дене каяш ямдылалтынна. Кремль полатыште сцене моткоч кугун чучын. А ынде кандаш ий утла тыште улам.
— Гастроль дене шочмо кундемышкет мийымет дене утларак тургыжланымаш шижалтеш, очыни?
— Гастроль дене Российысе тӱрлӧ олаште: Москваште, Нижний Новгородышто, Казаньыште, Ижевскыште… — лийынна. Чын, Курыкмарийыш мийыме годым чотак тургыжланенам, вет тушто мыйым шукын палат, садлан гримымат сайынрак пыштет, шинчамат чиялтет, мастарлыкым чотрак ончыкташ тыршет. Тыгай годым йолташ-шамычат «пӱшкылыт».
— А йот мландыште могай нелылык вашлиялтын?
— Школышто англичан йылмым сайын тунемын омыл. Спорт дене кылым кучышылан тудо нимоланат огеш кӱл шоненам. А кунам икымше гана 2009 ийыште Испанийыш, Францийыш гастроль дене миенна, тӱрлӧ национальностян коллектив дене вашлийынна, тунам йот йылмет кӱлеш улмаш. Тушеч пӧртылмеке, англичаным веле огыл, китай йылмымат тунемаш тӱҥалынам. Но тидлан чытышем ик жап веле ситен (воштылеш).
— Ансамбльыште вич ий куштымеке, Китайыш могай амал дене миенат?
— Пермь гыч ик йолташ Китайыш кайымыж нерген ойлен. Шуко шоналтыде, мыят тарваненам. Почешем мемнан коллектив гычак эше ик рвезе «ылыжын». 2012 ий июнь мучаште паша гыч каяш йодмашым серенна да документым монь погенна. Чанша, Шицзячжуан олаласе театрлаште 22 сентябрь гыч пашам ышташ тӱҥалынна, шоушто куштенна. Антре, степ, вальс, танго… Костюм-шамыч тушто моткоч сӧрал улыт: волгалтыт, йолгыжыт. Коллективыштына тӱрлӧ национальностян ӱдыр-рвезе-влак лийыныт: киргиз, беларус, украин, болгар, марий… Ик ий тушто пашам ыштымеке, контрактым шуяш кӱлын, но тӱрлӧ умылыдымашлан кӧра ме ышна код. Мӧҥгӧ пӧртылмеке, ялыште авайлан пакча кӧргыштӧ сомылым ышташ полшенам, а У ий лишан Казахстаныш йолташ-влак деке кудальым. Тылзат пеле жапыште пашамат муынам ыле, но документлан уэш Российыш толаш кӱлын, сандене, тышке-тушко кудалышташ огыл манын, Марий Элыштак кодым. Ик жап гыч Москош каенам, автосалонышто пашам ыштенам, но авам черланен да толаш логале.
— А вара уэш «Марий Эл» ансамбльыш кузе логалынат?
— Славик Михайловичын 6о ияш юбилейжылан пӧлеклалтше концертым ончаш толынам ыле. Коллективын куштымыж годым эре тавен шинченам, а ушем дене сценыште «чоҥештылынам». Концерт деч вара Славик Михайлович дене мутланенна, но тудо жаплан коллективыште вер лийын огыл. Тылзе наре шочмо ялыштем лиймеке, куан увер пуйто шулдырым куштен, тыманмеш Йошкар-Олашке толынам.
Ӧрдыж верыште лийме илышым вес шинча дене ончалаш, тӱняумылымашым вашталташ полшен.
— Сольный партиет шуко?
— Сольный партий-влакым «Мари парк» (Рвезе), «Марий кундемын моторлыкшо» (Купеч) спектакльлаште куштем. Тиддеч посна чыла гаяк куштымашыште: «Теҥгылыште», «Вич мужыр»… — улам.
— Артист-влак спортзалыште капкылым пеҥгыдемдат мо?
— Куштымашымат спорт дене таҥастараш лиеш. Тыге ме капкылнам пеҥгыдемдена. Жапше годым спортзалыш коштынам, но шуко огеш лий, уке гын чогашыл пеҥгыде лиеш, капын пластикыже йомеш. Сандене чылажат шке нормышто лийшаш.
— Кызыт балетым кушташ коштыда? Йӧсын пуалтеш мо?
— Ансамбль гыч 10 мужыр Сапаев лӱмеш опер да балет академический театрыш репетицийыш коштына. 23 апрельыште тушто «Раймонда» балетын премьерже лиеш. Меат тушто кушташ тӱҥалына. Мыланна, калык куштымашым куштышо-шамычлан, балетыште изиш нелырак чучеш, капкылат коршта, но мом ыштет: паша тугай.
Алевтина Байкова мутланен
Фотом еш альбомжо гыч налме
