Тиде кечылаште Марий кундемыште православный епархийым ыштымылан 25 ий темын. 1993 ий 25 июльышто Семёновка селасе Пресвятой Юмым шочыктышо Аван шочмыжлан черкыште Озаҥ ден Марий епархийын ответственный секретарьже Иоанн Тимофеевлан Йошкар-Ола да Марий епископ саным пуэныт. Тиде йӱлам тунам Москон да уло Русьын патриархше Алексий II эртарен. Тений тиде кечынак Йошкар-Оласе Православный рӱдерыште ты датылан пӧлеклалтше пайрем мероприятий-влак эртеныт.
Тачысе кечылан епархий ынде марий митрополийыш савырнен, Иоанланат митрополит саным пуэныт. Митрополийыште пашам ыштыше 98 храм, 33 часамла, кок монастырь улыт, тушто 112 священнослужитель пашам ышта. Тидын дене пырля эше ятыр черке уэмдалт олмыкталтеш, икмыняр часамла нӧлталтыт. Йошкар-Оланат православный шӱлышан лийын манам гын, йӧҥылыш ом лий. Ятыр у черке чоналтын, Пресвятой Юмым шочыктышо Аван, Патриарший площадь-влак ышталтыныт, Благовещений кафедральный собор шке омсажым почын. Патриарх Алексий II памятникым шогалтыме. Вет лач тудын вуйлатымыж почеш Марий кундемыште епархий ышталтын.
Пайрем службым Йошкар-Ола да Марий митрополит Иоанн шкежак эртарен. Тудлан Волжск да Шернур епископ Феофан, Алметьевск да Бугульма епископ Мефодий, Яранск да Лузский епископ Паисий да молат полшеныт. Тыгак чыла благочиний, моло епархий гыч уна-влак лийыныт. «Благовест» архиерейский йоча хор черке муро-влакым йоҥгалтарен. Икманаш, чылажат пеш торжественно эртен.
Варажым архипастырь-влак шке коллегыштым саламленыт да шуко пӧлекым кучыктеныт. Мутым ойлымышт годым нуно епархийын йол ӱмбаке шогалмаште Иоаннын суапшым поснак палемденыт. Лӱмгече дене митрополитым тыгак Москон да уло Русьын патриархше Кирилл саламлен. Пайрем мероприятийыште Марий Эл Республик вуйлатышын икымше алмаштышыже Михаил Васютин лийын.
Марий митрополит Иоаннын «Чылажланат Юмылан тау!» манме ойжо шарнымашеш кодо. Саламлыме деч вара тудо ойыртемалтше-влаклан наградым кучыктен: Йошкар-Оласе 4-ше №-ан поликлиникын врач-неврапотологшо С.И.Художниковлан — Руш православный черкын «В память столетия восстановления патриаршества в Русской Православной Церкви» юбилейный медальжым, Марий Элыште УФСИН начальникын алмаштышыже Е.В.Швецовлан — Йошкар-Оласе епархийын кумшо степенян марий епископ священномученник Леонидын медальжым.
Марий Эл Кугыжаныш Думын депутатше Анатолий Смирнов митрополитлан «80 лет законодательной власти Марий Эл» шарнымаш медальым да кундемнам духовно-нравственный христиан шӱлыш дене уэмден толмо пашажлан Марий Эл Кугыжаныш Погынын Чап грамотыжым кучыктен. Тидын дене пырля митрополит тӱрлӧ ведомство да министерстве деч эше ятыр тауштымаш ден Чап грамотым, пӧлекым налын. Торжественный ужаш деч вара пайрем концерт эртен.
С.Носова.
