уш православный черкын Священный Синодшо Марий епархийын ончычсо епископшо Леонид Антощенком Санкт-Петербургын святойжо-влак радамыш пурташ пунчалым луктын.
Лаврентий Евтихиевич Антощенко 1872 ий 6 (19) августышто кресаньык ешеш Екатеринославский губернийыште шочын. Оласе училище деч вара Свято-Троицкий Сергиев Лаврыш тунемаш пурен да вара тудын послушникше лийын. Куд ий гыч тудым Москосо кафедральный Чудов монастырьыш кусареныт. Тушто Лаврентий монах илышым ойырен да Леонид лӱмым налын. 1910 гыч 1927 ий марте Санкт-Петербургышто илен. Воронеж уремыште храмым чоҥымо пашам виктарен. Тушто черке-приход школым, Китайысе икшыве-шамычлан приютым, айык йӱла обществым почын. Октябрь революций деч вара приходым петыреныт, а тудо тусо черкыште пашам ышташ кодын. Икмыняр гана арестоватленытат.
1937 ий мартыште Марий кундемыш колтеныт. Ончыч священник Йошкар-Олаште илен, а октябрьыште Семёновко селасе Юмым Шочыктышо Пресвятой Аван шочмыжлан черкыште служитлаш тӱҥалын. Тиде ийынак декабрьыште Леонид Антощенком, революций ваштареш виктаралтше пашам шукта манын, арестоватленыт. Икмыняр кече гыч НКВД-н тройкыжо священнослужительым лӱен пушташ пунчалын. Приговорым 1938 ий 7 январьыште шуктеныт.
2002 ийыште Руш православный черке Леонид Антощенком официально святой-влак радамыш пуртен. Марий епископлан Оболенский-Ноготков лӱмеш площадьыште памятникым шогалтыме.
Снимкыште: Йошкар-Ола покшелне Леонид Антощенколан памятник.
Фотом «Православие в Марий Эл» воткыл лаштык гыч налме.
