20 июнь гыч 10 июль марте «Артек» тӱнямбалсе йоча рӱдерыште духовой йоча оркестр-влакын «Серебряные трубы Черноморья» фестивальышт «Тӱвыра» национальный проект полшымо дене эрта.
Тушко элна мучко ойырен налме эн сай духовой йоча коллектив ден барабанщик-влакын ансамбльышт чумыргеныт. Участник-влак Дагестан, Саха, Марий Эл республикла, Алтай, Красноярск кундем, Белгород, Владимир, Курган, Моско, Самара, Саратов областьла гыч улыт.
Мемнан республикын чапшым Национальный президент искусство школ пеленысе Духовой йоча оркестр арала. Вуйлатышыже – Александр Майков.
Фестиваль жапыште йоча-влаклан репетиций деч посна, тӱрлӧ мастер-класс-влак эртат.
22 июньышто 4 шагат эрдене сводный йоча духовой оркестр (чылаже 375 икшыве) «Артек-ареныште» шарнымаш акцийыш ушнен. Нуно «Священная война», «Адажио», «Прощание славянки» произведений-влакым шоктеныт.
А 27 июньышто Ялта серыште оркестр-влакын марш-парадышт лиеш, нуно курорт олан тӱрлӧ площадкыштыже концертым ончыктат.
Фестивальын ик эн тӱҥ ужашыже – гала-концерт. Тудо 30 июньышто «Артек-ареныште» эрта. Тудым 4 тӱжемат пеле ончышо эскерен кертеш. Гала-концертыште кажне оркестрлан плац-дефиле (музыкант-влак ошкылмышт годым музыкым шоктат) лиеш. А тиде жапыште 375 еҥан сводный оркестр Российын гимнжым шокта, тыгак «Моя Москва», «Пусть всегда будет солнце» да кумдан палыме йоча муро-влаклан попуррим колышташ темла.
А.БАЙКОВА
