С.Г.Чавайн лӱмеш национальный библиотекыште «В.Кудрявцевын палитрыже» выставке пашам ышта. Тудым искусствоведений доктор, Россий культурын сулло пашаеҥже, Россий художник-влак ушемын Марий Элысе пӧлкажын председательжын алмаштышыже Владимир Кудрявцев шке юбилейжылан пӧлеклен. 28 ноябрьыште Владимир Геннадьевич 60 ияш лӱмгечыжым палемдаш тӱҥалеш.
Владимир Кудрявцев — шӱдӧ утла шанче публикацийын, 7 книган авторжо. Тиддеч посна сӱретче марий матрёшкым ыштымыж дене республикыштына веле огыл, Российыштат, йот эллаштат палыме. Тидын нерген выставкыште улшо ик книгаште возымо пеҥгыдемда.
— Шукерте огыл кундемышкына Японий гыч турист-влак толыныт ыле. Лач нуно шке йылмышт дене лукмо книгам мылам пӧлеклышт. Тушто марий калык, мыйын нерген да матрёшкым кузе ыштыме, сӧрастарыме, тудлан марий шӱлышым пуртымо нерген возымо улмаш, — палемда Владимир Геннадьевич. — Икмыняр жап ончыч Японийыште лиймем годым нунылан мастер-классым эртаренам ыле. Тидым нуно возен коденыт да книгашкышт пуртеныт.
Владимир Геннадьевич ынде ятыр ий матрёшкым ышта. Эскизшымат тудо шкежак ямдыла.
Кумданрак — «Марий Эл» газетын
2017 ий 25 ноябрьыште лекше номерыштыже лудын кертыда
Алевтина Байкова.
