Тенийысе кеҥеж шокшо кечыж дене пеш куандара, садлан чон вургыжын кажныже отпуск жапшым вуча. Иктышт чемодан тич вургемым поген, теҥыз воктеке але курыкан вершӧрыш вашкат, а весыштлан шочмо кундемыштак канаш келша. Туге-гынат отпускым чылан сайын да пайдалын, ушеш кодшын эртараш тыршат.
Йолташ-влак, те канышдам кушто да кузе эртараш шонеда? Кушко миен толаш шонеда?
Арсений ЯЙЦОВ, Россий да Марий Эл культурын сулло пашаеҥже, гармонист:
– Козьмодемьянскыш турист-влак толаш тӱҥалмеке, кажне эрдене теплоходым, гармоньым шоктен, вашлиям да кастене тыгак ужатем. Кечыште кум-ныл теплоход толеш, эн пытартышыже кандаш шагат кастене кая. Турист-шамыч кокла гыч ынде мыйым шукынжо палат, садлан сылне сем почеш тавалтат, мурымат пырля муралтат. «Ик олаштат мемнам тыге огыт вашлий. Арсений, тый пеш молодец улат!» манмышт куандара. Поро паша весын веле огыл, шке кумылемат нӧлта.
Евгений НЕБОГАТИКОВ, У Торъял муниципал район вуйлатыше:
– Отпускым мӧҥгыштак, пелашем, шочшем да уныкам-влак дене пырля эртарем. Шокшо жап вольыклан кургым ямдылаш келшен толеш, садлан уло ешге ты пашам шукташ тӱҥалына.
Марий кундемна сылне вер-шӧрлан моткоч поян, адакшым У Торъял кундемыштат пӱртӱсна пеш мотор. Садлан каныш жапым чодыраште, эҥер воктене эртараш шонем, вет лач тиде пагыт выньыкашым налаш да колым кучаш келшен толеш.
Надежда ГОРДЕЕВА Марий Эл Кугыжаныш премийын лауреатше, поэт:
– Кеҥеж тений, чынжымак, шокшыжым ок чамане. Йырваш пеш сӧрал. Но мый утыжым шокшо игечым ом йӧрате, юалгырак кече утларак келша. Канышым изин-кугун вучем. Нимогай теҥызат мылам огеш кӱл. Ялыштемак пеш сай. Шочмо мланде кандара, эмла, илаш вийым ешара.
Наталья ПУШКИНА, Марий Эл Кугыжаныш Погын депутат:
– Тений отпуск деч посна тыршаш логалеш. 1 сентябрьыште Йошкар-Олаште 32-шо номеран школым почына. Ты тунемме верын директоржо улам. Чоҥымо, тӱрлӧ оборудованийым налме, документ-влакым ямдылыме, туныктышо ден тунемше, пашаеҥ-влакым чумырымо паша эше ятыр.
Роза ИСКАКОВА, Самырык-влаклан Олык Ипай лӱмеш Кугыжаныш премийын лауреатше:
– Каныш жап ушеш кодшо манын, тора кундемыш каяш нимолан. Родо-тукымем дене пырля лияш йӧратем, шочмо кундемыштем вий-куатым налам.
Каналташ молгунамсе семынак йолташем да лишыл еҥем-влак дене пырля Чолман эҥер воктеке миен толаш жапым муына манын ӱшанем.
А.БАЙКОВА ямдылен
Авторын фотожо
