Параньга районлан - 90 ий

Лӱмгече идалык ӱшаным ешара

Ал да ужар тӱс дене шелалтше пасум шӧртньӧ лышташан да нӧшман ош астра пеледыш, ший (ош) тӱсан имне таган да кок велым кок шӧртньӧ мӱкш, а ӱлнӧ марий тӱрын ош ӱжакаже ушен шогат. Теве тыгайрак Параньга районын гербше. Ош тӱс – рашлык да яндарлык, ал – чолгалык да ӱшанлык, ужарге – илыш вий да поянлык. Нине тӱсым арам огыл ойырен налме – нуно ик ешла келшен илыше марий, татар да руш калыклан утларак лишыл улыт.

Ший тӱсан имне таган эн ончычак илышлан негызым пыштыше ял пашам, пиалым да йӧным тыланыше сурт аралтышым ончыкта да эше тыште шагал огыл чотан татар калыкын юмын йӱлажлан келшыше пелтылзым ушештара. Ош астрат тудын тӱр ойыртемжылан лишыл. А кок велым кок мӱкш марий ден татар да моло калыкын икгаяк пашаче улмыштым, марий тӱран да поро чонан Марий кундемыште келшен ыштымыштым ончыкта. Тыгак лийын да тыгак лийшаш.

Параньга район жапше годым лачак ялозанлыкыште шумо ошкылжо  дене ойыртемалтын. Кызытат, кодшо ийысе кӱкшытым ончалаш гын, ялозанлык продукцийым ыштен налмаш ончылийсе деч 3,2 процентлан кушкын да 6 миллиардат 712 миллион теҥгеаш шуын. Район ик еҥлан шотлымаште мыняр ыштен налме дене ончычсылак ончыл радамыште. Озанлыклаште ушкал ден сурткайык ешаралтыныт, шӧр ден шыл да шурно лектыш кугемын. Тышке кугу надырым «Победа» ялозанлык кооператив пыштен, тыгак ончычсо озанлыкла негызеш шочшо фермер озанлык  ден посна предприниматель-влак кертмышт семын полшеныт.

А теве промышленность ончылийсе  деч мӧҥгештын. «Параньга торф предприятий» ОАО гына нелылыкым сеҥен илаш тӧча, лектышым кугемда. «Водоканал» МУП вӱдым ситараш тырша. А молыштлан  коронавирус инфекций шарлыме кугу эҥгекым ыштен. Тидлан кӧрак торговльо ден общепитын оборотышт 35  ден 69 процентлан иземыныт. Но тений потребитель рынкысе сӱрет саемшаш. Индивидуальный предприниматель-влакын тачысе пашашт гыч тидыже раш коеш. Адакше районын лӱмгече идалыкше ӱшаным ешара.

Ю.ИСАКОВ

Опубликовать в Одноклассники

Добавить комментарий