Параньга районлан - 90 ий

Черет шога – тугеже еҥ-влаклан келша!

Параньга посёлкысо Тукай уремыште, ты илыме верын рӱдӧ ужашыж деч изишлан гына умбалнырак, автосервис уло. Тудым оптымо кермыч эше утыжым тоштемын огыл. Тугеже  пеш шукертыжак ыштыме огыл…

Автосервисыш мийымына годым тудын воктене икмыняр машина шога ыле. Чыланат тушко пураш да улшо экшыкыштым тӧрлаташ черетым вученыт. А тиде мо нерген ойла? Тыште мом да кузе ыштыме, шотыш кондымо, ачалыме еҥ-шамычлан келша!

Нунын кумылыштым ты автосервисыште эше мо дене савырат? Тидын нерген тудын озаже Марат Муратов деч шкеж дечак йодаш, тыгак молан лачшымак тыгай сынан пашам тӱҥалаш кумылжо лекмым рашемдаш лийым.

– Автосервисым мый лу ий наре ончыч, 2011 ийыште, почынам. Рашрак каласаш гын, документ почеш тиде 1 ноябрьыште лийын. Но ачалыме-тӧрлымӧ пашажым шукташ 2012 ий январьыште тӱҥалме. Тымартеже автосервислан чоҥымо оралтым шотыш конден шукташ тыршенна, – палдарыш предприниматель.

А такшым шке пашам тӱҥалаш, автосервисым почаш шонымашыже теве кузе шочын. Параньга поселкысо кыдалаш школ деч вара рвезе тунамсе политехын (кызыт тиде – Юл кундем кугыжаныш технологий университет – авт.), информатике да вычислительный технике факультетышкыже тунемаш пурен. Пытарымекше, икмыняр жап ик пӧръеҥын  фирмыштыже пашам ыштен. Но ты сомыл йӧршынат технике дене кылдалтше лийын огыл: теве гына кӱшыл образованийым налын, мӧҥгышкыжӧ пӧртылшӧ самырык специалист… кӱварым чоҥымаште тыршен! Тыге тунамак Маратын шке пашам почаш кумылжо лектын.

– Тудо пагытыште автосервис дене кылдалтше пашам шуктымо шотышто конкуренций лийын огыл гаяк. Кугурак услугым пуышо-влак веле улыт ыле. Сандене мыйын шукырак да сайрак услугым пуаш шонымаш лектын,  – рашемдыш Марат Камилевич.

Ойлымыж почеш, тудын мартеат развал-схождений манмым шотыш кондышо-влак лийыныт. Но нуно тидым тыглай оборудований дене ыштеныт. А самырык рвезе – Марат тунам 23 ияшрак веле лийын – чапле оборудованийым налын да тидым электронный  йӧн дене шукташ тӱҥалын.

Автосервисым почмыжлан вашке лу ият шуэш. Но тушто тудо алят пашам шкетынак ышта. Чотак кӱлмӧ годым але ярсымыж семын коклан ачаже полшаш толеш.

– Тынар ий жапыште клиент-шамычат шукынак погыненыт. Эре мый декемак гына толшо-влакат шагалын огытыл. Поснак районла гыч ятырын улыт. Нунын дене пашам ышташ шканемат келша, – мане чолга амалкалче.

Мо оҥайже, ойлымыж почеш, телым тидым-тудым ачалаш, ончалаш, шотыш кондаш йодшо-влак шагалемыт.

– Тиде январьыште, февральыште да март тӱҥалтыште чотак палдырна. Шоналташ гын, машина шуко, жап эртыме семын тудо пудырга, но молан нине тылзыште клиент шагалемеш, тиде мо дене кылдалтын – автосервисыште тынар жап ыштем гынат, алят умылтарен ом керт. Чыным ойлем: амалжым шкежат кызыт мартеат ом пале, – мане пӧръеҥ да вашмутшо дене ялт ӧрыктарыш!

Вара тыге умылтараш тыршыш:

– Очыни, тидыже паша дене кылдалтын. Нине тылзылаште чоҥымо паша шагал шукталтеш. А пӧръеҥ-шамыч утларакше тыгай сынан калымыш коштыт. Санденак тунам оксашт шагалемеш да машинаштым олмыкташат кондаш огыт тырше, очыни. Мый тыге шонем. Вет кӧмыт тудо пагытыште толын огытыл гын, кызыт техникыштым автосервисыш кондат да утларакше ходовой часть манмым, электрикым тӧрлаташ, ӱйым вашталташ, молымат ыштен пуаш йодыт.

Клиент-шамычын шукак улмыштым шотыш налын, ончыкыжым Марат автосервисшым кумдаҥдаш шона.

– Тунам вес пашаеҥ-шамычым налаш йӧн лиеш. А тыге гын, управляющийым шогалтем да сомылым тек тудо виктара. Шкеже гын чон йодмо почеш вес пашам шуктен кертам ыле, вет мылам эше моло сомылат келшат. Мутлан, кызыт ярсыме семын еҥ-влакын йодмышт почеш пачерлаште ремонтым ыштем, – шылтыде каласыш пӧръеҥ.

Тугеже тек самырык амалкалчын нине шонымашыже шукталтыт. Тудлан тидым уло кумылын тыланена!

 

Любовь КАМАЛЕТДИНОВА

Авторын фотожо

Опубликовать в Одноклассники

Добавить комментарий