Марий Эл правительствыште республикыште правопорядкым эскерыме шотышто Координационный советын заседанийже эртен. Тудым Александр Евстифеев вӱден.
Заседанийын пашаштыже регион вуйлатышын икымше алмаштышыже Сергей Сметанин, Марий Эл республикыште тӱҥ федеральный инспектор Петр Журавлёв, ФСБ-н Марий Элысе управлений начальникше Сергей Кивачук да Элкӧргӧ паша министр Виктор Косарев лийыныт.
Погынышо-влак ийготыш шудымо-влак шотышто осал койыш ваштареш ешартыш мерым ыштыме нерген каҥашеныт. Тидын нерген докладыштышт МВД вуйлатышын алмаштышыже Евгений Корец, Марий Эл вуйлатыше пеленсе йочан праваже шотышто уполномоченный Евгений Бурдо, образований да науко министр Наталья Адамова ойленыт. Нуно «Служба примирения» йӧным сайлан шотленыт да ончыкыжым республикысе тунеммме учрежденийлаште кучылташ кӱлмӧ нерген шонымашыштым каласеныт.
Тыгак потребительский рынкыште, ритуал услугым пуымаште, илыме вер да коммунальный озанлык сферыште, пассажир-влакым шупшыктымаште, икмыняр моло шотышто общественный да экономический лӱдыкшыдымылыкым ыштымаште шуктымо паша нерген мутланеныт. Тидын нерген республикысе МВД-н полиций начальникше Сергей Федорович, экономическмй вияҥмаш да торговльо министрын алмаштышыже Маргарита Лежнина, промышленность, транспорт да корно озанлык министрын пашажым шуктышо Дмитрий Волков, чоҥымо паша, архитектур, илыме вер да коммунальный озанлык министрын икымше алмаштышыже Константин Хижняк ойленыт.
Л.Камалетдинова.
