Республикыштына у коронавирус инфекций дене кылдалтше ситуаций тугаяк неле: 15 октябрь эрдене пытартыш суткаште регионысо 9 инфекционный стационарыш 106 черлым эмлалташ пыштыме нерген увер тольо. 16 октябрь эрдене больницылашке эше 119 пациентын логалмыж нерген шижтарышт. 17 октябрьыште больницылашке 91 еҥ у коронавирус инфекций деч эмлалташ возын, 18 октябрьыште – 73, 19 октябрьыште – 71.
Чыла тидым шотыш налын, регионыштына коронавирусан черле-влаклан медицине полышым пуымо койко чотым кугемдыме. Тыге, Йоча республиканский клинический больницыште ковидный манме эше 50 койкым ешарыме. Тушто ынде изи пациент-влакым веле огыл, кугыеҥ-шамычымат эмлат. Сар-влакын ветераныштын республикысе клинический госпитальыштышт ковидный отделений эше 30 койкылан кумдаҥын. Советский районысо рӱдӧ больницын стационарысе 50 койкыжым коронавирусан да пневмониян пациент-шамычлан медицине полышым пуаш келыштарыме. Тушко Советский районысо веле огыл, тыгак Йошкар-Оласе, Оршанке да Медведево районласе черле-влакым эмлаш пыштат.
19 октябрьлан налмаште республикысе 10 стационарыште 1087 койкым коронавирусан пациент-влакым эмлаш келыштарыме.
У коронавирус инфекций дене черланыше-влак ончычсо семынак Йошкар-Олаште (51,7%), Медведево районышто (10,8%) да Волжск олаште (8,9%) эн шукын улыт.
Ийготым ончалаш гын, икымше верыш 50-64 ияш-влак логалыныт — 31,9 процент, кокымшо верыш – 30-49 ияш-шамыч (28,2%), кумшо верыш – 65 ий деч кугурак-влак (24,2%). Самырык-шамыч кокла гыч 18-29 ияш-шамыч чӱчкыдынрак черланат – 7,5 процент, 1 гыч 6 да 7 гыч 14 ияш марте ӱдыр-рвезе-влакын черланыме процентышт 3,2 цифрыш шуын, 15-17 ияш подростко-шамычын – 1,1 процент марте, идалыкаш марте аза-влакын – 0,7 процент йотке.
Пандемий пагытыше 4562 (83,4%) еҥ паремын, 59 черле колен.
М.ИВАНОВА
