Федеральный вузлаште да Йошкар-Оласе медицине колледжыште шинчымашым погышо 230 утла ординатор ден студент у коронавирус инфекций дене поснак шуко еҥын черланымыж пагытыште Марий Элысе медицине организацийлаште персоналлан лийме семын полшен да тунемме верлашкыже пӧртылын.
Республикысе поликлинике ден эмлымвер-влакым вуйлатыше-шамычын мутышт почеш, тиде полышым аклен мошташыжат неле: тений январь-февральыште медицине пашаеҥ-влакын пашашт икмыняр пачаш ешаралтын, сандене ешартыш вий лачеш лийын.
90 еҥ – ординатор ден вузлаште да медколледжыште тунемше- шамыч – эмлымверлаште, поликлиникылаште, медицине полышым вашке пуымо станцийыште пашам ыштеныт, ты чот гыч 20 еҥже – «йошкар зонылаште».
144 еҥ – 1 ординатор, вузлаште тунемше 52 студент да Йошкар-Оласе медицине колледжыште шинчымашым погышо 91 ӱдыр-рвезе – практикым медорганизацийлаште эртен. Ончыкылык медик-шамыч мӧҥгыштӧ эмлалтше черле-влакын да нунын дене кылым кучышо еҥ-шамычын тазалыкышт нерген уверым телефон дене погеныт, тыгак поликлиникыш мийыше пациент-влакым анализыштын результатышт дене палдареныт, регистратур пашаеҥ-шамычлан полшеныт.
Таче кечылан Марий Элыште у коронавирус инфекций дене кылдалтше сӱрет палынак саемын, да ординатор ден студент-влак тунемме заведенийлашкышт кӱшыл да кокла медицине шинчымашым налаш пӧртылыныт.
М.ИВАНОВА