Тарля кокан аважын лӱмжымат ынде ом шарне, тиде пеш шукерте лийын, тудым чыланат Семон кува маныт ыле…
Изирак капан, шемалге чурийвылышан, тыглай икмарда ӱдырамаш кок ӱдырым ончен куштыш. Иктыже – Тарля кока, ял пелен лакеме гын, весыже, Майрук, олаште илаш тӱҥале. Кӱ полат нӧлтымаште пашам ыштен, тиде пашаланак тунем лектын. Самырык годым чылажат куштылгын чучеш, вӱр модеш… Пеленже ола гыч йолташ ӱдырым кондаш тӱҥале, лӱмжӧ – Милук. Ӱдыр пеш мотор, шемалгырак чатка чурий, шемшоптыр гай шем шинча, кап-кылже лывырге, шкеже пеш чулым. Майрукымат уда ом ман, кок ӱдыр, сылне пеледыш гай волгалтын, илышлан куанен ваш келшен. Кажне гана ялыш толмекышт, калыкын шинчашкыже логалаш тӱҥальыч, моктеммут чурийыштым ик гана вел огыл чевертен.
Милук – тулыкеш кодшо, ача-ава шокшым палыде кушкын, тудым изаже ончен куштен, йол ӱмбак шогалтен. Йолташ ӱдыржын ешыштыже тудо шокшо шӱлышан поро кумылым шижын, сандене ялышке толмыж еда пиалан улмыж гай чучын. Ӱдыр ужын, Семон кува шочшыжо-влакым йӧратен куштен, арулыклан, ыштыш-кучышлан, поро кумыл койышлан туныкташ шагал огыл вийым пыштен. Милукым шкенжымат пашалан туныктен куштеныт, сандене унала толмыжо годым яра шинчен огыл.
«Мом ышташ кӱлеш? Мом полшаш?» манын йодде, иктым-весым полышкален. Тидыже Тарля кока ден Семон кувалан моткоч келшен. Изиракна годым модын куржталме коклаште ик гана веле огыл колалтын:
– Ала-кӧн сай шешкыже лиеш…
Н.ЩЕРБАКОВА
Умбакыже 2021 ий 24 сентябрьыште лекше»Марий Эл» газетыште лудса. Чоным тарватыше повестьым, ойлымашым, илыш гыч луднеда гын, «Марий Эл» газетлан подпискым ыштыза.
