Телым лум леведыш гыч шуҥгалтмылан кӧра чӱчкыдынак электровоштыр кӱрышталтеш. Санденак «Мариэнерго» филиал компаний, предприятий, учреждений да организаций-влакын вуйлатышыштлан, тыгак зданий-влакын озаштлан лум ден ийым леведыш гыч жапыштыже кораҥдаш кӱлмӧ нерген шижтарат. Энергообъект лишне пашам шуктымо годым лӱдыкшыдымылык правилым шотыш налаш темлат.
Илыме пӧрт ден оралте лишне электролиний улмо годым, лумым эрыктышыла, поснак эскерыман. Лум ора але ий чумырка воштырыш камвочшаш огытыл, уке гын тудо кӱрылт кертеш але ток перен сеҥа.
Лумым леведыш гыч кышкыме да коштмо вер гыч кораҥдыме годым энергообъектлам аралыме кумдыкым шотыш налман. Тиде кумдыкшым электровий дене лӱдыкшо деч посна пайдаланышашлан палемдыме.
Ушештарена, аралыме кумдык – тиде электролиний шуйналтме кок велысе кумдык. 0,4 киловольт куатан линийлан тудо кок велымат 2 метр лопкыт лиеш, 6-10 киловольт куатанлан – 10 метр, 35 киловольт куатанлан – 15 метр, 110 киловольт куатанлан – 20 метр.
Леведыш гыч лумым але ий сӱсым кораҥдыме годым энергетик-влак теве мом шотыш налаш темлат:
— кечалтше але кӱрылтшӧ воштырым ида тӱкӧ;
— кӱрылтшӧ воштыр деке 8 метр деч чак ида лишем;
— воштыр кӱрылтмым але меҥге камвочмым ужында гын, тиде верым авырен налаш тыршыза, эскерышым шогалтыза да экшык нерген компанийын контакт-рӱдержын телефонжо дене але сетьым виктарыше рӱдерын диспетчержылан увертарыза;
— леведыш гыч лум ден ий сӱсым кораҥдыме годым лӱдыкшо ынже лий манын, зданийыш пурышо электровоштырышто тулым йӧртышашлан йодмашым сетьым виктарыше рӱдерыш ончылгоч пуыман, тыгодым пашам шуктышаш верым да жапым раш ончыктыман.
«Мариэнерго» филиалын электросеть комплексшын пашам ыштымыж дене кылдалтше йодыш дене компанийын контакт-рӱдержын 8-800-220-0-220 телефонжо дене яра йыҥгыртен кертыда.
Ю.ИСАКОВ
