16 ноябрьыште Марий Элыште тӱҥ федеральный инспектор Петр Журавлёв производствышто азап лиймылан кӧра тазалыкым лунчыртышо да профессиональный черан граждан-влаклан у автомашина сравочым пуымо церемонийыште лийын. Тиде мероприятий Социальный страхований фондын регионысо пӧлкаштыже эртен.
Мероприятийыште тыгак Социальный страхований фондын Марий Элысе пӧлкажым виктарыше Александр Щитов, Общероссийский калык фронтын Марий Элысе штабшын сопредседательже Наталья Богомолова, Марий Элыште Медико-социальный экспертизе бюрон эксперт паша шотышто вуйлатышыжын алмаштышыже Олег Федорин лийыныт.
Тазалыкым производствышто локтылшо-шамычлан куснылмо средствым ынде латшымше ий ойырат. Тиде жапыште чылаже 195 единице техникым пуэныт, тыгодым у машинам кажне шым ий гыч ситареныт. Тӱҥалтыште «Ока» маркан изирак авто лийын, вара инвалид-влакым ВАЗ-2105 машинаш кусареныт. Кызыт кид дене виктарыме да автоматический передаче коробкан «LadaGranta» автомобильым ойырат.
Петр Журавлёвын палемдымыж почеш, инвалид-влаклан автомашинам ойырымаш – тиде кугыжанышын социальный политикыжын пеҥгыдылыкше. «Эҥгекыш логалшылан транспорт – илышлан келыштаралташ кӱлшӧ средства гыч иктыже. Тудын улмыж дене тазалыкыште экшык улман еҥ-шамычын ончылнышт корно утларак кумдаҥеш, нунылан ик вер гыч весыш куснылаш сай йӧн пуалтеш. А тидыже тачысе илышыште моткочак кӱлешан», – манын тудо..
Марий Элыште тӱҥ федеральный инспекторын аппаратшын уверже негызеш М.ИВАНОВА ямдылен.
