УВЕР ЙОГЫН

Кӧ тыгай улат, «Юл кундемысе маньяк»?

 Неужели ик айдеме тынар еҥым пуштын кертеш?  Шучкын чучеш, но криминалист-влакын увертарымышт почеш, осал пашам ыштыме верлаште эре ик ДНК-код вашлиялтеш. Пытартыш гана айдеме пуштшо шем кышажым 2012 ий сентябрьыште Уфаште коден. Тидын деч вара ты ийынак тудо ик подъездысе видеокамерын объективышкыже логалын. Тыге, чыла фактым иктыш чумырен, фотороботым ыштыме. Но…

«Чурий раш огыл. Тӱжвал тӱс дене писын гына айдемын кӧ да кушто улмыжым палаш ок лий. Кидпале шотышто ойлаш гын, мемнан данный-влакын базыште кызытеш уке», – Россий Федераций Следствий комитетын Нижний Новгородысо управленийжын поснак кӱлешан да кугу дела шотышто следовательже Д. Мясников каласен.

Тудын увертарымыж почеш, версий тӱрлӧ. Расследований кызыт могай этапыште, айдеме пуштшо кызыт кушто лийын кертеш –  следовательын чыла тидым увертараш праваже уке. Но ик версий почеш, самырык еҥ Озаҥ ола гычак лийын кертеш, туге гынат вес регионымат списке гыч лукташ ок лий.

Палемдыман, тиде уголовный дела дене кызытат следователь-влакын кугу командышт пашам ышта. Пашаш, мутат уке, психолог-шамычымат ушымо. А нунын шонымашышт могай, маныда?

Фотороботым ончен, теве могай эмоциональный портретым сӱретленыт: «Шинчаончалтыш шала огыл, иктураш ончышо. Ок шыргыж, тӱрвыжым ишыктен. Тыгай айдемым рушлаже «интровертный тип личности» маныт. Шуко мутланыше огыл, шкет илыше, очыни». Психологын шонымыж почеш, тудо еҥ-влакым оксалан але моло поянлыклан гына огыл пуштеда, амалже весе. Могай? Тидым кызытеш шкеже гына пала, а следователь-влаклан турлӧ версийым тергаш веле кодеш.

Расследованийым эртарыше-влакым эше теве мо умылыдымашым луктеш: маньяк пушташ ик йӧным гына кучылтеш – пикта. Тидым шотыш налаш гын, тудым кучаш неле огыл манын шоналтет, туге гынат самырык еҥ тачат эрыкыште да, психолог-влакын ойымышт почеш, тудо уэш Озаҥышкак пӧртылын кертеш. Эн шуко осал пашажым тудо лач Татарстаныште ыштен – тиде таклан огыл, можыч, ты кундемыштак шочын кушкын. Психически черлат лийын кертеш. Шкак шоналтыза, молан тудо лач илалше-влакым пуштеда, тыгодым пӧръеҥым огыл, а ӱдырамашым веле? Тугеже, можыч, лач тыгай ийготан ковай тудым шке жапыштыже орландарен да тидлан ӱчым шукта? Кӧ пала, кызыт раш огыл, туге гынат следователь-влак мемнан регионышто илыше калыкланат тӱткӧ лияш темлат, кеч-могай уверат нунылан шерге да кулешан.

                            Россий криминал практикым шергалына

Россий криминал практикыште кумыт деч шагал огыл еҥын ӱмыржым лугыч ыштыше айдемым «маньяк» але «серий дене пуштедыше» маныт. Тыгай-влак элыштына вашлиялтыт, икмынярже дене палдарыме шуэш.

«Доктор Смерть»

Максим Петров. Петербургын историйыштыже ик эн шучко маньяк. Тудым эсогыл «Доктор Смерть» маныныт. Тыглай терапевтлан тыршен. Черле илалше еҥ деке тудо эрдене миен, давленийжым висен, уколым ыштен да пӧрткӧргышто улшо поянлыкым шолыштын. Шкенжым палдараш огыл манын, пушташ кӱзым але товарым кучылтын. Чылаже 12 еҥын ӱмыржым лугыч ыштен. Маньякым кучаш «Медбрат» операций эртаралтын, тушко эсогыл 700 утла милиционерым ушеныт. Петровым ӱмырешлан эрык деч посна коденыт.

«Курортысо маньяк»

Эдуард Шемяков. Шем пашажым Петербургышто 1996-98-ше ийлаште ыштылын. Икымше ӱдырым уремыште 15 гана кӱзӧ дене шуралтен, виешлен, вуйжым капше деч шӱшкыл ойырен. Тыге икте почеш весым… Пытартыш гана тудо айдемын капше гыч икмыняр ужашыжым пучкын налын, жаритлен да кочкын. Кызыт маньякым психиатрический эмлыверыште.

«Виешлыше милиционер»

Павел Шувалов. Милиционерлан пашам ыштыше тиде айдеме ийготыш шудымо ӱдыр-влакым виешлен, вара пуштын. Шокшынек тудым кучен кертын огытыл, свидетель семын йодыштмо годым йылмыже шкак «рудалтын».

«Битцево маньяк»

Александр Пичушкин. Москосо Битцево чодыра паркыште озаланен. Чылаже 49 еҥым пуштын. Шахматла модаш йӧратен. Осал пашам ыштыме деч вара шахмат оҥан клеткыжым клеитлен шындылын. А тушто мыняр клетке? 64. Лач тынар еҥым пушташ шонен пыштен улмаш. Ӱмырешлан эрык деч посна коденыт.

«Юбкым чийыше Раскольников»

Ирина Гайдамачук. Ӱдырамаш-маньяк-влак кокла гыч иктыже. Чылаже 17 еҥын (пенсионерын) ӱмыржым лугыч ыштен. Тӱҥ шотышто осал пашаж дене Красноуфимскыште чапланен. 7 ий тудым кучаш тыршеныт. Верысе ГУВД вуйлатышын алмаштышын аважым пуштмеке гына, тидым ыштен кертыныт. Осал пашам ыштышым 20 ийлан эрык деч посна коденыт – закон почеш ӱдырамашым ӱмырешлан шуркалыше кӱртньывоштыр вес велыш колтен огыт керт.

Г.Кожевникова. 

Материалым Россий Федераций Следствий комитетын Марий Элыште следствий  Марий Элысе Следствий управленийын пресс-службыжын полшымыж дене ямдылыме.  

Опубликовать в Одноклассники

Добавить комментарий