МАРИЙ ТӰНЯ

Кӧ кусарен пуэн?

Кӧ кусарен пуэн?

Таче мыланем теве тыгай фотом колтышт. Тудым Йошкар-Оласе ик кочмыверыште ыштеныт. Руш ден англичан йылмылам палыше еҥже вигак умыла, очыни, мо нерген возымо. А теве марий еҥже але марий йылмым палышыже вуйдорыкшым сайынак тарватылшаш. Шонен ӧрат, кӧ тыге кусарен пуэн? «Соблюдайте чистоту!» манмыжым изиш йоҥылыш кусарымылан шинчам петыраш лиеш. Такше «Арулыкым эскерыза» лийшаш ыле. Нимат огыл, «пырля эскерена» маннешт ыле, очыни. 
А умбакыже мо? Марий журналист-влакым «йоҥылыш возеда, марий йылмыште тыгай мут уке, мом возеда, огына умыло» да тулеч моло семынат шылтален ойлымым шуко гана колына. Ындыжым мыят ӧрмалыгышым — шочмо йылмем тынарак ом пале улмаш. «Золоте», «цельже шогалеш», «шӱргыжӧ….луктын кудалте».., уке, чумыр предложенийже-влакымак лудын ончыза. Йылме дене пырля вуйдорыкет тугалтеш. «Администрация» мутшат марлаште «Администраций» возалтшаш. 
Закон почеш организаций, предприятий да учреждений-влакын лӱмышт Марий Элысе кок кугыжаныш йылме дене сералтшаш.  Йошкар-Олаште тидым оласе администраций шотыш конда — марлашкат кусараш темла. Но тидым кажныже могай йӧн дене ышта, нунылан кӧ кусарен пуа? Ик гана огыл ойлымо: МарНИИЯЛИ-ын йылме пӧлкажын специалистше-влак. Но тиде случайыште раш умылена: тидым нуно огыл кусареныт. Яндекс-переводчик гочат кусарен ончышым. Икмыняр ужышыжым тыгак йоҥылыш пуа, тӱрысшӧ туштат тыге огеш кусаре. Ӱшанем, марий йылмым палыше журналистат тыге кусарен огеш пу.
Ончыкыжымат тыгай мыскылтыш ынже лий манын, мом ыштыман? 
Мутат уке, предприятий вуйлатыше-влак специалист-шамычлан кусарыктышаш улыт. А нунышт шукынжак огытыл. Сандене кызытеш кок корно:
1. Кусарыше-влакым ямдылыме шотышто йодышым верже гыч тарватыманак.
2. Яндекс-переводчик дене пашам ыштыман. Але марте тудын базыштыже 275 тӱжем предложений. Тиде сомылым институтын йылмызыже ден специалистше-влак ышташ полшеныт. Ятыр ий дене ямдылыме 10 томан Марий йылме мутерым да моло пашамат пуртымо. Тудым МарНИИЯЛИ ден Яндекс коклаште ыштыме ойпидыш негызеш технический пашажым шуктышо Андрей Чемышевынн палемдымыж почеш, Яндекс-переводчикыште марий йылме шотышто базе «идеальный» лийже манын, 1 миллион предложенийым (ойым) пуртыман. Тидын шотышто кызыт паша мыняр-гынат ышталтеш, но, манмыла, кид вий ок сите. Адашке, иктаж проектым возен, ты паша икмыняр еҥым ушен, писештараш лиеш ыле. 
А тачеш тыгай сӱрет — марий йылмыш йоҥылыш кусарыме дене йылмынан яндарлыкше йомын толеш. 
Светлана Пехметова 
 
Опубликовать в Одноклассники

Добавить комментарий