Южо категорий граждан-влак юридический полышым тӱлыде налын кертыт манын колынам. Тыгак мо?
Е.Кузнецова.
Студенко посёлко.
Йодышлан Медведево районысо прокурорын кугурак полышкалышыже С.Г.Белова вашештен:
— «Россий Федерацийыште юридический полышым яра пуымо нерген» (21.11.2011) федеральный законын положенийже почеш, адвокат-влак юридический полышым яра пуымо кугыжаныш системыланат полшат. Тӱлыман огыл юрполышым тыгай граждан-влак налын кертыт:
1) ешын кокла доходшо РФ субьектыште палемдыме илен лекме кугыт деч изирак гын, але шкет илыше гражданин, кудын доходшо тыгак илен лекме кугыт деч изирак;
2) I да II группан инвалид-влак;
3) Кугу Отечественный сарын ветеранже, Россий Федерацийын, Совет Ушемын, Социалистический пашан, РФ Пашан Геройжо-влак;
4) инвалид, ава-ача деч поснак кодшо, тулык йоча-влак, тыгак нунын законный представительышт, кунам нуно шке икшывыштын законный праваштым арален налаш тыршат.
4.1) Ача-ава деч посна кодшо икшывым ончаш налаш кумылан лица-влак, кунам нуно йочам ешыш налаш шонымо дене кылдалтше йодыш дене яра юридический полышым налнешт;
4.2) Йочам эргылыкеш але ӱдырлыкеш налше ача-ава-влак, кунам нуно ашнаш налме тыгай йоча-влакын закон ден келшыше интересыштым да праваштым арален налнешт;
5) Социальный обслуживаний организацийлаште илыше илалше граждан ден инвалид-влак;
6) Ийготыш шудымо-влак коклаште надзор ден правам пудыртымаш шотышто профилактик системысе учрежденийлаште илыше, тыгак эрык деч посна кодымо ийготыш шудымо-влак, нунын законный представительышт, кунам нунылан ийготыш шудымо икшыве-влакын законный интересыштым да праваштым аралаш кӱлеш (уголовный судопроизводство дене кылдалтше юрист полыш тышке ок пуро);
7) «Психиатрий полыш да тудым пуымо годым граждан-влакын праваштын гарантийышт нерген» РФ Закон дене келшышын юридический полышым яра налын кертше-влак;
8) Судын пунчалже дене пашам ыштен кертдымылан шотлымо граждан-влак, тыгак нунын законный представительышт, кунам нуно тыгай граждан-влакын праваштым аралыме дене кылдалтше йодыш шотышто яра юридический полшым налнешт;
8.1) Чрезвычайный ситуаций годым туткарыш логалше граждан-влак:
а) чрезвычайный ситуаций лийме кечылан регистрироватлыме лийше вате-марий-влак;
б) чрезвычайный ситуацийлан кӧра колышын икшывыже-влак, тыгак ача- аваже;
в) чрезвычайный ситуацийлан кӧра колышын кӱшешыже илыше, тыгак закон почеш иждивенецлан шотлалтше лица-влак;
г) чрезвычайный ситуацийлан кӧра тазалык шотышто кугу эҥгекыш логалше граждан-влак;
е) туткарлан кӧра илыме вер, моло пого деч посна кодшо, документым йомдарыше граждан-влак;
9) тыгак моло Федерал закон да Российысе субьект-влакын законышт дене келшышын юридический полшым яра налын кертше-влак.
С.Носова ямлдылен.