Куштен-муренат моштат, талынат куржталыт

22-23 майыште Йошкар-Олаште республик кӱкшытан президент спорт состязаний лийын. Тӱҥ таҥасымаш-влак «Дружба» стадионышто эртеныт. Тушто чылаже 14 команде вийжым терген. Ял ден селаласе  школлаште тунемше ӱдыр-рвезе-влакын (4 ӱдыр да 4 рвезе) командыштым посна акленыт. Тыгайже 8 команде лийын. Ты гана программе почеш индешымше классыште тунемше-шамыч мастар, писе, чолга улмыштым ончыктеныт. Участник-влак спорт многоборьеште (тест-влак), творческий да теоретический конкурслаште, эстафетыште таҥасеныт.

Тӱрлӧ конкурсын да таҥасымашын очкоштым ушен, икымше верыш Волжский районысо Пӧтъял кыдалаш школын командыже (вуйлатышыже М.Тимофеев), кокымшыш Параньга районысо Кугу Пумарий школын ӱдыр-рвезыже-влак (вуйлатышышт П.Романов), кумшо верыш Оршанке районысо Кугу ӧрша школын командыже (А.Кузьминых) лектыныт. Тиде таҥасымаште эше Провой кундемысе Кужмарий кыдалаш школын ӱдыр-рвезыже-влак вийыштым тергеныт, но нунышт моло деч изирак ийготан (8-ше класс) лийыныт, сандене очкоштым шотлен огытыл.

– Икымше кечын йоча-влак сценыште мастарлыкыштым, художественный номерым ончыктеныт. Теорий конкурсышто уш-акылыштым пудыратылыныт. Тиде да теорий конкурсышто изиш тургыжланенам, но чылажат сайын эртыш, – ойла Пӧтъял командын вуйлатышыже Мирон Сергеевич. – Посна ойырен каласаш ом тошт, чылаштымат мокталтыме шуэш. Молодец улыт, тыршеныт. Ме латвич ий ончыч ойыртемалтынна ыле, теве ынде шке классем дене икымше верыш лектынна. Нимом шылтыде, тыге каласем: ӱдыр-рвезе-влакат, мыят куаненна. Икмыняр ий почела Пӧтъял школын командыже ончыко лектын, вуйлатыше Альберт Аркадьевич Семёнов дене пырля Шем теҥыз воктене республикын чапшым арален. Икмынярын эн тале-влак коклашкат логалыныт.

– Тунемше-влаклан эртаралтше шкешотан таҥасымаш ӱдыр-рвезе-влакым иктыш уша. Мыланна чылажат келшыш. Отжиманийым ыштымаште изиш окшаклена, – шыргыжыт Параньга районысо Кугу Пумарий школын 9-ше классыштыже тунемше-влак. Оҥай ыле такшым…

– Чыла видыште тыршышт. Шкештым сценыштат, куржталме корныштат кучен моштат. Мемнан команде кажне ийын призёр радамыш логалеш. Тений куаненна: кокымшо верым налынна. ™дыр-рвезе-влак пеҥгыде да икоян команде улмыштым ончыктышт. Такшым тидлан ончылгоч рӱжге ямдылалташ тӱҥалыныт. Икте-весылан полшеныт, икте-весым умылаш тыршеныт, сандене кокымшо лийыныт. Адакшым кугурак-влак, мутлан изаже шӱжарже, акаже шольыж верч тургыжланеныт, полшеныт, – ойла тренерышт П.Романов. – Школышто кугурак-влак дене ямдылалтына. Тыге изирак-шамыч, кугуракым ончен, нунын гай лийнешт. Жап шыгыр гынат, чыла вере шукташ тыршена. Нине индешымше классыште тунемше-влакак моло вес таҥасымашлаште вийыштым тергат, республик кӱкшытыштат призёр радамыш логалыт, а тыгай деч вара вес сеҥымашлан, турнирлан ямдылалташ пуйто у шӱлыш почылтеш. Чыла велым шуаралтын кушкыт гын, ончыкылык корныштышт сайрак лиеш.

– Ме тыгай таҥасымаште икымше гана вийнам тергенна да, вучыдымын   кумшо верым налынна. Тидыже куандара. Чылан пеш сайын выступатлышт. Йоча шагаллан кӧра ялласе школлаште ик классыште ныл рвезе ден ныл ӱдырым муашыже ок лий. Мутлан, я рвезе-влак улыт, ик ӱдыр ок сите але – мӧҥгешла. Тыгаят лиеш, – тунемше-влакын результатыштым мокталтен мане кумшо верым налше командын вуйлатышыже А.Кузьминых.   

Оласе класс-команде коклаште радам тыгай:

1. 1-ше №-ан Морко школ;
2. Йошкар-Оласе 28-ше №-ан лицей;
3. Волжск оласе лицей;
4. Шернурысо 2-шо №-ан школ.

Сеҥыше команде-влак сентябрьыште Шем теҥыз воктене всероссийский президент модмаште Марий Элын чапшым аралаш тӱҥалыт. Нунылан сай, кӱкшӧ результатым, пиалан куржталме корным тыланена. 

Ялысе команде-влак коклаште тыгай радам лийын:

1. Пӧтъял кыдалаш школ (Волжский район);
2. Кугу Пумарий кыдалаш школ (Параньга район);
3. Кугу ӧрша кыдалаш школ (Оршанке район);
4. Мариец кыдалаш школ (Марий Турек);
5. ™шнур кыдалаш школ (Советский район);
6. Тотшто Торъял кыдалаш школ (У Торъял район);
7. Марьино кыдалаш школ (Юрино район).

Е.Эшкинина.