Тений кургым ончычсо ийла дене таҥастарымаште варашрак ямдылаш тӱҥалме, да тудым кызытеш шагал шапашлыме.
Тенийсе июнь койыш-шоктышыж дене, чынжымак, ӧрыктарыш. Йӱр чӱчкыдын лийын, тыгодым юалге игече шоген. Мландыште вӱдыжгӧ ситышын лийын гынат, юалгылан кӧра кургылык кушкыл писын атыланен ыш керт. Лачак тылзе мучаште игече кунар-гынат тӧрланыш, да тидлан кӧра шукияш шудо палынак нӧлталт кайыш. Тыге тӱшка озанлык-влак кургывечыш техникым луктыч.
Ялозанлык да продовольствий министерстве гыч пурышо увер почеш, тений тӱшка ден фермер озанлык-шамыч кургылык кушкылым 82,5 тӱжем гектар гыч поген налшаш улыт. 28 июньлан 6,2 тӱжем гектарыште солымо. Кукшо шудым 47,4 тӱжем тонным ямдылаш палемдеме. Ончыктымо кечылан Курыкмарий ден Медведево районлаште 77 тонным шапашлыме. Кодшо ийын тиде жаплан 13,7 тӱжем тонным ямдылыме лийын. Сенажым вынемлашке 87 тӱжем чоло тонным оптыман гын, 6,9 тӱжем тонным пыштыме. Ты пашаште Курыкмарий, Медведево ден Шернур район-влак ойыртемалтыт. Силосым 197,6 тӱжем тонным шапашлыман гын, 18,5 тӱжем тонным оптымо. Ты пашаште Звенигово ден У Торъял район-влак ойыртемалтыт.
Икияш шурно пасушто шӱкшудо, шукш-копшаҥге, поҥго чер ваштареш кучедалме паша умбакыже шуйна. Гербицидым 57 тӱжем гектарыш шавыме, фунгицидым – 5,6 тӱжем, инсектицидым – 3,5 тӱжем гектарыш.
В.Смоленцев.
