У Торъял район Овалже ялыште илыше-влак шке кундемыштым тӱзатышаш да эшеат сӧралым ыштышаш верч азапланат.
Тиде шонымаш денак кодшо кечылаште изак-шоляк Сидоркинмытын: Николай Аркадьевичын – инициативный группо вуйлатышын да Александр Аркадьевичын – ялын старостыжын – таратымышт дене тыште илыше кумылан еҥ-влак Немда эҥерын ик серышкыже пушеҥге ден кушкылым шынденыт.
Николай Аркадьевичын палдарымыж почеш, тиде поро пашашке чылаже 26 еҥ ушнен. Нунын коклаште латкудытынжо сулен налме канышыш лекше лийыныт.
Инициативный группым вуйлатыше эше кок чолга пӧръеҥым – Вячеслав Иванович Садовин ден Владимир Геннадьевич Ивановым – поснак палемдыш. Икымшыж дене пырля пушеҥгым шындаш келшен толшо верым кычалыныт, моло пашам шуктеныт гын, кокымшыжо трактор дене сӧремым куралын, мландым ямдылен. А шынденытше кожым, пӱнчым, куэм – чылаже 300 наре пушеҥгым.
Тыге тыште кундемыштым веле огыл сылнештареныт, тыгак кумдыкым шошымсо вӱдшор, мландым эррозий деч араленыт, ончыкыжым вольыкым коштыкташ, кӱтӱчӧ-шамычлан канаш йӧнан верым ыштеныт.
Л.КАМАЛЕТДИНОВА
