УВЕР ЙОГЫН

Кундемнам тӱзатена Тыныс кавалан тыге тауштеныт

У Торъял районысо Токтарсола ялыште Кугу Отечественный сарыште вуйыштым пыштыше-влаклан обелиск такше лийын. Тудым ятыр моло вере семынак кодшо курымыштак, рашрак каласаш гын, 80-ше ийла тӱҥалтыште, шогалтеныт улмаш. Но ты жапыште шарныктыш чотак тоштемын. Тудо шӧрын каяш, сарын участникше-шамычын возымо фамилийышт ӱштылалташ тӱҥалын, адакшым тиде радамыште йоҥылыш-влакат лийыныт.

Чыла тидым шотыш налын, Тошто Торъял ял шотан илем администрацийыш пурышо яллаште илыше-влак дене мутланен, тиде обелискым уэмдаш ойым пидыныт.

Но тыгай пашалан шагал огыл шийвундо кӱлеш. Сандене кугыжаныш велымат полыш лийже манын,  «Верысе инициативе-влакын проектышт» республиканский программыш логалаш шонен, йодмашым колташ мутланен келшеныт. Проектым кызыт ешыж дене Токтарсола ялыште илыше-влак кокла гыч иктыже, Евгений Викторович Небогатиков, возен. Шкенжын палдарымыж почеш, проект «Есть священное место в каждом селе» маналтеш.

Ямдылен шуктымеке, конкурсыш заявкым колтеныт. Но тунам тиде проект сеҥыше-влак радамыш логалын огыл. Пиал тений шыргыжалын! Сеҥымышт нерген майыште увертарыме деч вара тыште паша шолаш тӱҥалын. Программе дене келшышын, тиде проектлан республиканский да верысе бюджетла гычат окса ойыралтын.

Инициативный группо вуйлатыше Валентина Семеновна Горинован  ойлымыж почеш, администраций кумдыкыш пурышо яллаште илыше калык дечат оксам погеныт. Чылаже 105 тӱжем теҥгем чумыреныт. Мо оҥайже, вес яллаште илыше-шамычше шийвундыштым пуаш тореш лийын огытыл. Кажне  еш тӱҥ шотышто 1 тӱжем теҥге дене пыштен. Кӧ чӱдынрак ила гын, тыгай-влак  да пенсионер-шамыч деч веле 500 теҥге дене налыныт.

Проектын авторжын рашемдымыж почеш, тӱрыс акше 312 тӱжем теҥгешке шуын. Тиде окса дене обелискым тӱрыс уэмденыт манашат лиеш. Ончычсыж деч шпиль веле кодын. Кызыт ты вер торашкак волгалтеш да кажне корныеҥым пурен лекташыжак огыл гын, жаплан чарналтен шогалын, тӱслен ончаш чотак тарата. А вет тиде кумдыкым тӱзатымаште шагал огыл сомылжым ял калык да кумылан еҥ-шамыч яра ыштеныт! Тыге сарыш кайыше да тушто вуйыштым пыштыше ачашт, кочашт, пошкудышт, палымышт ончылно шке порысыштым шуктеныт, кызыт вуй ӱмбалне тыныс кава улмылан тыге тауштеныт…

Проектым илышыш пуртымаште Евгений Викторович икмыняр посна еҥым лӱмышт денак палемден кодыш. Мутлан, Токтарсола ялын старостыжо Виталий Николаевич Мосоловым, инициативный группо вуйлатыше Валентина Семеновна Гориновам, верысе ветеран-влак организаций вуйлатыше Нина Степановна Крыловам каласыш.

— Ял шотан илем администраций вуйлатыше Николай Иванович Широбоковым ойыренак палемдыман. Проектлан документым ямдылымаште, тудым аралымаште чот тыршен. Калыкым чумырымаште, еҥ-влакым кумылаҥдымаште надырже моткоч кугу. Инициативный группо денат тудак пашам ыштен, — каласыш Е.Небогатиков.

Тыгак  верысе школ, администраций, тӱвыра пӧрт, библиотеке пашаеҥ-влакат чот полшеныт манын палемдыш.

Обелискым уэмден тӧрлатыме пашам июльышто тӱҥалыныт да сентябрь мучаште чылажат ямде лийын. 1 октябрьыште тудым торжественно почыныт. Тушко верысе администраций ден школ гыч, тылыште тыршыше, тӱрлӧ ялла гыч еҥ-влак чумыргеныт. Сарын участникше-влакым пагалымым ончыктен, обелиск деке пеледыш аршашым пыштеныт, а тунемше-влак чонеш логалше муро-влакым йоҥгалтареныт.

Кодшо кечылаште меат Токтарсолаште лийна да обелиск деке миен толна. Тиде жапыште, пуйто ончылгоч мутланен келшенна, шарныктыш кумдыкым умбакыжат тӱзаташ шонен, ялсовет, тӱвыра пӧрт, библиотеке пашаеҥ-влак лачак пеледышым шындаш лектыныт ыле. Тугеже ончыкыжым тиде вер эшеат сылне лиеш. 

   

Любовь КАМАЛЕТДИНОВА

Авторын фотожо

Опубликовать в Одноклассники

Добавить комментарий