Марий Эл Республикысе культурын пагалыме пашаеҥже ден искусствын пагалыме деятельже-влак!
Отрасльын шерге ветеранже-влак!
Тендам Культур пашаеҥын кечыж дене саламлем!
Тиде пайрем календарьыште тичмаш права дене ойыртемалтше верым налын шога да палемдымыш шуаш тыршымашышт дене еҥ-влакым шке почешышт кумылаҥден наҥгаен, сай кумылым пӧлеклен, живописьын, кинематографийын произведенийыштым йӧратен ончаш, шӱм-чоным вӱчкышӧ музыкым колышташ, куштымо да театральный искусство дене кумылым нӧлташ йӧным пуэн кертше творческий вий-куатан еҥ-влакым иктыш уша.
Культур – пеш кугу элын шуко курымаш историйыштыже мемнан калыкнан погымо моткоч кугу поянлыкше. Кызытсе общественный поянлык системе лач тудын негызеш вияҥеш. Шкендан пашада гоч те шӱм-чон поянлыкым почын пуэда, чылажымат ужын, колын, шижын да пырля аклен моштышо поро да шотан еҥ-влакын шинчымашыштым нӧлтеда да шуарен куштеда.
Тендан илышым тӱзатыме пашада чынже денак алал кумылын кӱкшын аклалтшаш.
Россий ден Марий Эл Республикын правительствышт элын кызытсе да ончыкылык илышышт лӱмеш отрасльым вияҥден толмо пашан могай кӱлешан улмыжым тӱрыснек умылат. Россий Президентын тӱҥалтышыж почеш шыҥдаралт толшо «Культур» национальный проект ты шотышто пеш кугу полышлан шотлалтеш. Кодшо ийыште гына нацпроектын кышкарыштыже 6 культур пєртым олмыктымо, Чумыр марий йоча хорым, Чумыр марий йоча духовой оркестрым, Чумыр марий йоча симфонический оркестрым, виртуальный концерт залым ыштыме. С.Г.Чавайн лӱмеш национальный библиотеке книга-влакым цифрыш кусарыме шотышто пашам тӱҥалын. Тений тиде паша умбакыже шуйна.
Тылеч посна ме Кугу Сеҥымашын 75-ше идалыкшым да Марий Элын курымаш лӱмгечыжым пайремлаш ямдылалтме шотышто пеш кугу задачым шуктышаш улына. Нине чапле мероприятийлам эртарымашке пеш кугу надырым пыштеда манын ӱшанем.
Марий кундемын пиалже лӱмеш тыршаш, республикын культур традицийжым арален кодаш да умбакыже пойдараш ямде улмыланда таум ойлем.
Поснак кугу тау отрасльын ветеранже-влаклан. Те йӧратыме пашалан ӱшанле улмым ончыктымо шотышто чапле примерлан шотлалтыда, те мастарлыкда, палемдымыш шушаш верч чот тыршен пашам ыштен моштымыда дене самырык тукымым палдарен кертында.
Чыла еҥлан ончыкыжат творческий сеҥымашке шуаш, кумыл нӧлтын пашам ышташ, у идейым, пеҥгыде тазалыкым да илышыште чыла сайым тыланем.
Марий Эл Республикым Вуйлатыше А.А.ЕВСТИФЕЕВ
