Изарнян Э.Сапаев лӱмеш опер да балет кугыжаныш театрыште Марий Эл Республикыште мер тӱҥалтышлан полышым пуымо толкынын икымше форумжо эртен.
Тушко республикын чыла олаж ден районжо гыч толшо эн чолга, илышнам саемдаш полшышо шуко сай шонымашан еҥ-влак погыненыт ыле. Нуным саламлаш Марий Эл Республик вуйлатыше Александр Евстифеев да республик правительствын еҥже-влак миеныт. Форумым республикыште мер тӱҥалтышлан полышым пуымо толкынын координаторжо, Российысе пенсионер-влакын партийыштын региональный пӧлкажым вуйлатыше Валентина Злобина почын. Тудын ойлымыж почеш, у толкынын штабыштыже 60 еҥ пашам ышта, а чылаже тудо 300 чоло чолга еҥым уша.
Таче кажне айдеме жапшым, талантшым, чолгалыкшым шке кундемжым тӱзатымашке виктарен кертеш. Тыгай еҥже-влак республикыште шукын улыт. Иктыже — ты толкынын республиканский штабшын еҥже, Йошкар-Оласе икымше №-ан поликлиникын тӱҥ врачшын алмаштышыже Нелли Андрюхина. Сцене гыч тудо шкеж гай чолга еҥ-влак, нунын илышыш шыҥдарыме темлымашышт нерген каласкален, мер пашаштлан тауштен. Мучашлан тудо республикысе мер тӱҥалтыш-влак дене кылдалтше паша нерген каласкалыше икымше сборникым савыкытыме дене палдарен. Тушко илышыш шыҥдарыме 100 утла мер темлымаш пурталтын.
Тиде сборникым Андрюхина Марий Эл Республик вуйлатыше Александр Евстифеевлан кучыктен. Вашешыже регион вуйлатыше форумыш погынышо-влакым саламлен да социально-значимый проект-влакым темлыше чолга ен-влакым тауштымашан серыш дене палемден. «Мер темлымаш-влакым илышыш шыҥдараш кучемат, бизнесъеҥ-влакат полшышаш улыт. Тыге ме кугурак лектышыш шуын кертына. А темлымашым чумырымо ты сборник — тиде эше кугу да сай пашан тӱҥалтышыже веле. Ончыкжымат шуйышаш ты паша мыняр-гынат илышнам сайракым ышташ полшышаш, — каласен регион вуйлатыше.
Тауштымашан серыш дене палемдалтше коклаште куд еҥ лийын. Мутлан, ик тыгай проектлан «Россий Федераций флагын эстафетыжым» шотлымо. Тудым Марий радиомеханический техникумын директоржо Валерий Данилов эртараш тӱҥалаш темлен. «Самырык-влакын инициативный группышт» региональный мер организаций правленийын еҥже, Курыкмарий кундемын шочшыжо Павел Сурнов «Ары вады» («Айык кас») проектлан палемдалтын. А теве индивидуальный предприниматель Илья Шумков «Звенигово олан чонжо — тудын серже» проектым илышыш шыҥдарен. Марий Турек районысо ӱдырамаш-влак ушемын еҥже Наталья Шамуратова «Ший ийготан-влакын школышт» проектлан палемдалтын. Тыгак Шернур районысо Марисола тӱвыра да каныме рӱдер вуйлатыше Лидия Павлова ялым тӱзатыме дене кылдалтше пашалан вуйын шоген. Йошкар-Оласе Йоча да самырык-влакын усталык полатыштын «Импульс» лидер кумылым вияҥдаш полшышо рӱдер вуйлатыше Ирина Герасимова «Йошкар-Олан йӱлышӧ чонжо-влак — пашаште» проект дене ойыртемалтын.
Форумым вӱдышын ойлымыж семынак, чынжымак, чолга мер пашаеҥ-влакын темлымышт илышыш кучемын полшымыж деч посна шыҥдаралт огыт керт. Сандене форумыш толшо-влакым саламлаш, нуным мокталташ да у пашалан кумылаҥдаш Марий Эл Республикын внутренний политике, верысе самоуправленийым вияҥдымаш да юстиций министрже Михаилов Данилов толын ыле.
Тидын деч вара форумыш толшо-влакым ик эн сай социально-значимый проект-влак дене палдареныт. Кажне проектым ямдылыше еҥ-влак дене палыме лияш йӧн лийын. Тидыжым ончаш толшо-влаклан ончыкыжым эшеат чолгарак лияш, нунын деч тунемаш полшышо пример семынат аклаш лиеш. Вет форум годым презентоватлыме проект-влак илышыш шыҥдаралтыныт да верлаште калыклан мыняр-гынат илышыштым саемдаш, кундемыштым тӱзаташ, кумылыштым нӧлталаш полшеныт. Лач тидын нерген республикыште мер тӱҥалтышлан полышым пуымо толкынын координаторжо Валентина Злобина мучаште ойлен. Вес тыгай мероприятийым сентябрьыште эртараш палемдыме. Форум пайрем концерт дене мучашлалтын.
С.Носова.
М.Скобелевын фотожо.
