Марий Эл вуйлатыше Кугыжаныш службышто кадр политике йодыш шотышто комиссийын заседанийжым эртарен.
Заседанийым почмыж годым Юрий Зайцев ушештарен: РФ президент Владимир Путин «Кадры» лӱман у национальный проект дене палдарен, тӱҥ амалже – специалист-влак огыт сите, а тидыже россий экономикын ик эн тӱҥ лӱдыкшыжлан шотлалтеш.
«Кугыжаныш службо системе ончылно тыглай огыл задаче да нелылык-влак палдырнат. Госаппаратыште специалист-влак огыт сите. Чаманаш логалеш, таче кечын образовательный организацийын выпускникше-шамычлан госслужбо пешыжак келшен толшо паша верлан ок шотлалт, самырык специалист-влак кучем органла гыч каят. Сандене, кызытсе кадровый потенциалым арален кодаш, госслужбыш молодёжым ушаш да йӧршын вес у качестван кугыжаныш службым чумыраш манын, кугыжаныш властьын органлаштыже кадр шотышто политикым шыҥдарымаште тиде йодышым угыч ончен лекман», – палемден республикым вуйлатыше.
Тӱҥ докладым Марий Эл вуйлатышын администрацийжын руководительжын алмаштышыже, Кугыжаныш гражданский службо, кадр да кугыжаныш награде управленийын начальникше Елена Петухова ыштен. Тудо палемден: самырык-влак гражданский службыш толышт манын, келшыше условийым ыштыман, кызытсе виян специалист-влакым паша верыштак кодыман, тыгак кугыжаныш органлаште кадр шотышто пашам саемдаш информационный технологийым кучылтман.
Тиде йодыш дене вашталтыш-влакым пуртымеке, ончыкыжым госслужбыш специалист-влак толыт да калык властьлан утларак ӱшанаш тӱҥалеш, каласен Юрий Зайцев.
Марий Эл Республикым вуйлатышын пресс-службыжын уверже негызеш
Л.СЕМЕНОВА ямдылен
Д.РЕЧКИНЫН фотожо
