Кодшо арнян газет редакцийышкына Параньга районысо Ондропсола ялыште илыше Сергей Петров пурыш.
– Тӱрлӧ оралтым чоҥышо кум еҥан бригадем дене тӱҥ шотышто Москвашке пашам ышташ коштына. Икана, мӧҥгыштӧ улмына годым, мемнан деке Параньга посёлко гыч Ильфат Насыров тольо да Киров область Слободской районысо Совья посёлкыштыжо вольык фермым чоҥаш йодо. Чыла пашалан 800 тӱжем теҥгем сӧрыш. Мыланна ак келшыш. Паша ойпидышым ышна ыште, шкенан районыштак илыше еҥлан ӱшанышна, – тургыжланымыжым шылтыде каласкала Сергей Аркадьевич. – Фермым визытын чоҥышна: мыйын кум еҥан бригадем да Ильфат ден йолташыже. Ильфатше, манмыла, коклазе лийын, заказчикше Параньга посёлко гычак Евгений Мальчуков лийын. Кок арня гыч кажныланна 35 тӱжем теҥге дене авансым пуышт, вара эше 50 тӱжем теҥге дене ешарышт. Оралтым леведаш стропилым гына шогалташ кодын ыле – фермыш трактор кудал пурыш. Ты жапыште ме кӱшнӧ пашам ыштенна. Ик чоҥызем ӱлыкӧ камвозо, чот пудыргыльо. Эмлымверыште операцийымат ыштышт. Кызытат йӧслана. Мыйынат кок ӧрдыжлуэм шырпеште. «Тек чыла чекым пога, эмлалтме роскотшым пӧртылтем», – мане тунам Евгений. Но мутшо таче кечынат южышто кеча: ик ырымат пуэн огыл. Тракторжо – верысе озанлыкын. Мешаен ала-мо? Вес трактор трос дене шупшылын, а тидет скоростьышто шоген улмаш: ончылнысо техникым шӱкалын, фермыш шкеак, тракторист виктарыме деч посна, кудал пурен, чыла ирен.
Оралтым угыч чоҥаш кӱлын, тидлан эше 400 тӱжем теҥгем ешарен тӱлаш сӧрышт. Ынде пашанан чумыр акше 1 миллионат 200 тӱжем теҥгеш шуо. Чыла ыштышна. Леведышыш калайым веле пышташ кодо. Кутырен келшыме акын пел суммыжым налнена ыле – оксам ышт пу. Ильфат дечын распискым возаш йодна, но тудо Женя деке гына колтыш. Пашадарым тӱлымӧ шотышто ала-мо уто-ситым, ондалаш шонымым шижмек, ӱзгарнам, арвернам погалтышна да, кутырен келшыме акын кеч пел суммыжым пуымекыда, кодшо пашам мучашке шуктена манын, мӧҥгӧ кайышна. Ильфат ден йолташыже кодыч.
Кумданрак — «Марий Эл» газетын
2017 ий 17 октябрьыште лекше номерыштыже лудын кертыда.
М.ИВАНОВА.
