Тачысе кечылан Марий Элыште чылаже республик кӱкшытан 10 кугыжаныш пӱртус заказник да 42 пӱртӱс памятник уло.
Кажне ийын республикын Пӱртӱс поянык, экологий да йырым-йырысе средам аралыме министерствыжын специалистше-влак нине кумдыкышто увертарыше палым уэмдыме да угыч шогалтыме пашам эртарат. Вет тушко мийыше еҥ-шамычат палышаш улыт — кугыжанышын шулдыр йымаке налме кумдыклаште посна режимым эскерыман. Тений республикысе бюджет кӱшеш тыгай увертарыше щит ден аншлаг-влакым Килемар районысо Куплоҥга, Тыр, Мадарский, Курыкмарий районысо Карасьяр, Нужьяр, Медведево районысо Мартын куплаште да Килемар районышто угыч ыштыме – Пошкит купышто – вераҥдыме.
Тыгак Килемар районысо «Тогашевский» заказникыште аншлагым уэмдыме.
Ужар поянлыкнам пойдарат
Республикысе профессионал-технический образований системым ыштымылан 80 ий темын.
Тидын вашеш ты сферын да Марий Элын Образований да науко министерствыжын, Квалификацийым вияҥдыме регионысо методический рӱдерын специалистше, тунемше-шамыч Куяр лесничествыште 4,2 гектарыште 8000 пӱнчӧ озымым вераҥдыме Шарнымаш аллейлан негызым пыштеныт.
Шолып руат
Звенигово районысо кок чодыра участкыште пушеҥгым шолып руымо кок сӱрет рашемын.
Полицийыш йодмашым Звенигово лесничествын пашаеҥже возен да увертарен: Суслоҥгер лесничествыште палыдыме еҥ-влак 48 пушеҥгым шолып руэн каеныт. Тышеч 46-шо лышташан, кокытшо иман лийыныт.
Тыгак шолыштмаш нерген йодмаш Кокшайскысе лесничестве гыч пурен. Тушто 32 иман пушеҥгым руэныт. Кызыт ты кок случай почешыжат тергымаш кая, кугыжанышлан ыштыме эҥгекын кугытшо рашемдалтеш.
С.НОСОВА
