Неле чер эпидемият мыланна, Российыште илыше калыклан, шкенан йӧратыме шочмо элнан эн тӱҥ кугыжаныш пайремжым палемдаш мешаен кертын огыл. Тений тудо тӱҥ шотышто виртуальный йӧн дене эртен гынат, пайрем кумыл садак шижалтын. Марий Элын рӱдолаштыже веле огыл шуко тӱрлӧ мероприятий эртен: флешмоб, акций, концерт, автопрбег-влак… Пытартышыже эрденак Самырык-влакын полатышт деч тӱҥалын. Российысе кум тӱсан флагым пижыктыман автомашина-влак ола уремла мучко эртеныт.
Почылтын пайрем мероприятий радам Ленин лӱмеш рӱдӧ площадьыште, Самырык-влакын полатыштышт, тыгак моло вере Российысе кугыжаныш флагым торжественно нӧлталме дене. Мутат уке, тыгай церемонийыш Марий Эл Правительствын, Йошкар-Оласе, районласе администрацийын еҥже-влак ушненыт.
Тӱрлӧ акций шотыштыжо ушештараш гын, чылажат карантин условийым шотыш налын эртаралтын. Мутлан, «Шӱм гыч лекше тауштымаш» акций, шке сурт-пачер гыч лекде, лишыл еҥ-влакым саламлаш ӱжын. А тидлан кагаз гыч пӱчкын луктын, але тӱрлен але фотографироватлен, Российысе флаг сынан «шӱмым» соцсетьлаш вераҥдаш темлалтын.
«Давай, Россия» куштымаш флешмобыш ушнашат, тыгак нигуш каяш кӱлын огыл. Тыгай лӱман муро почеш куштымаш видеом войзен, «Челси» группын интернетысе лаштыкышкыже вераҥдаш йӧн лийын. Мут толмашеш, оласе рӱдо каныме паркын «Карусель» куштышо ансамбльжымат тушто ужын кертынна.
А такшым, ты кечын оласе пӧртласе окналаште, омса валне Российын кум тӱсан символжым шуко вере ужын кертме. Тӱвыра полатла, уремласе площадкылаште изирак концерт-влак эртеныт. Кеч артист-влакын мастарлыкыштым шке пачер окна гыч онченыт да колыштыныт.
Пайрем деч ончычак уремысе сӱретче-влак тыгак шкешотан фестивальым эртараш палемденыт. Но пашашт ик тематикылан пӧлеклалтшаш, палемденыт ончылгоч. Жапын йодмыжым шотыш налыныт да тудым эпидемий дене кучедалше медик, волонтёр, ЖКХ, соцпашаеҥ-шамычлан пӧлеклаш кӱлешлан шотленыт. Лач нуно ты неле саманыште тыглай калыклан илаш полшат. Санденак лач нуно сӱретче-влакын арт-обьектлашкышт савырненыт.
Теве Йошкар-Олаште тыгай обьектше икмыняр ышталтын. Иктыж нерген ушештаренак кодыман. Тудо «Спасибо врачам» маналтеш да тушто коронавирус деч аралалтме костюмым чийыше эмлызын чурийже ончыкталтын. Графити
сӱретым оласе 1-ше №-ан поликлинике ончыко вераҥдыме. Тудым сӱретче-влак Илья Белов ден Олег Мясников ыштеныт. Чумырен ыштыме образыште кажне еҥ палыме врачшын сынжым шекланен кертеш, умылтареныт автор-влак. Сӱретым фотографироватлаш мийыме годым мемнан корреспондентна тушто Роман Соболевым вашлийын. Тудо шкежат коронавирус чер дене черланен улмаш, но оласе рӱдӧ эмлымверын врачше-влакын тыршымыштлан кӧра тӧрланен кертын. Тиде амал денак уремысе сӱретым ончалаш лӱмын миен ыле.
Арт-объектым вераҥдыме вержым Йошкар-Оласе администраций дене пырля ойырен налме.
Российын кечыже вашеш элна мучко вес акцият эртен. Шочмо эл нерген муро-влакым мурыман видеом социальный лаштыклаш вераҥдаш кӱлын. Мут толмашеш, тидлан Угарман кундемысе «Лекше выт» калык фольклор ансамбльын солистше Сергей Огурцов кумылаҥын да интернет тӱняште шагал огыл лайкым поген. Тудын марла йоҥгалтарыме Российын гимнже шукыштлан келшен.
Мутат уке, Российын кечыжым районлаштат палемденыт, кугыжаныш флагым торжественно нӧлтеныт. А теве Звенигово олаште гын кугыжаныш пайрем лӱмеш эсогыл Юл эҥерыште изи судно-влакын парадыштым «Мечта» каныш да тӱвыра рӱдер организоватлен. Районысо администраций, Изи судно шотышто оласе кугыжаныш инспекцият мепроприятийым сайлан шотленыт. Тушко чылаже 15 судно ушнен. Юл сер воктеч Российын флагшым пижыктыман тынар суднын ийын кайымыжым ончаш толшо-шамычат лийыныт.
Козьмодемьянскыштат Юл эҥерыште ИЛ- 6 парусно-гребной шлюпкышто ты кечын Российысе флагым торжественно нӧлталыныт.
Светлана НОСОВА
Снимкылаште: Российын кечыжым палемдена.
М.Скобелевын фотожо.
