ЙӰЛА МАРИЙ ЙӰЛА

«Кугечылан – у тувыр»

Шочмо калыкнан Кугече пайремже толын шуеш. 
Эх, изи годым  тиде пайремым кузе чот йӧратен вученна! Чевер муныжлан, шӱштыра эгерчыжлан, ӱян мелнажлан, пыреман шыл когыльыжлан, шоҥешталтше пуражлан веле огыл. Авай тиде кечын у тувырым чиктен! Кеҥеж вашеш тудо эн вучымо пӧлек лийын. Модаш чийыме огыл — аныклыме. Пошкудыш, родо деке кайыме годым веле.

Марий тӱр рӱдерын черетан проектше «Кугечылан – у тувыр» маналтеш. Тений кокымшо гана лиеш. Тудым эртарымашке ӱмашсе семынак «Энсай» салон, Йошкар-Оласе «Марий кумалтыш»  общине да «Мари» сийгудо ушнат.

Кажне Кугече пайремлан у тувырым ыштен чийыме йӱла тачат ила. Кугече — кугу виян кече. Тудын дене шуко тӱрлӧ йӱла кылдалтын. Марий тӱр рӱдер вуйлатыше И.Степанован палемдымыж почеш, мутлан, Кугече Юмылан пӱтырымӧ сортам идалык мучко суртышто аралат, эн кугу амал годым тудым чӱктат. Але вес йӱла – Кугече кечым вашлиймеке, мӧҥгӧ толмо годым кукшу вондым ниялтет гынат, тудо пеледеш, маныт. Кугече муным идалык мучко юмылукышто аралтыш семын кучат.

Кугече пайремым тӱшкан, марий йӱла почеш вашлияш кумылда уло гын, ушныза. У тувырым ямдылен улыда гын, мемнан пайрем-фестивальышке чиен мийыза. Тушто «Марий вургем мастар» ден «Марий вургемым чийыше» номинацийла дене конкурс лиеш. Ушнаш кумылан-влак ончылгоч йыҥгыртен (+79648629009 номер дене) увертарыза.

Мероприятийыш Кугече пайремлан марий йӱла почеш ямдылыме чес дене мийыман.

С.Пехметова.

Снимкыште: «Кугечылан — у тувыр» фестивальын ӱмашсе участникше-влак.

М.Скобелевын фотожо.

Опубликовать в Одноклассники

Добавить комментарий